Атырауда нөмірі 27 орта мектебінің мұғалімі туберкулездің ашық түріне шалдыққаны белгілі болды. Мұны естіген жетпіске жуық ата-ана мекемені карантинге жабуды талап етіп, үлкен жанжал шығарды.
Ашуланған ата-аналардың алдында мектеп директоры, СЭС мамандары және прокурор жауап берді. Себебі, мектепте «Өзін өзі тану» пәнінің ұстазы туберкулез дертімен ауыратынын бұқаралық ақпарат құралдарынан білген. Ата-аналардың наразылығы аталмыш ауруға шалдыққан оқытушының осыған қарамастан әлі күнге дейін білім ордасында қызметін атқарғанына байланысты. Оның үстіне, бұл жайлы не мектеп әкімшілігі, не СЭС мамандары да бейхабар.
Ұстаздың ауруға шалдыққаны кезекті медициналық бақылаудың нәтижесінде белгілі болыпты. Соңғы рет мұғалім тексерістен былтырғы наурыз айында өткен көрінеді. Әзірге инфекциялық аурудың бір жыл ішінде неліктен өршіп кеткендігін арнайы мамандар анықтауда. Ал әйелдің өзі туберкулезге қарсы диспансерге орналастырылыпты. Ата-аналардың «мектеп қабырғасында дезинфекциялық шаралары атқарылды ма?» деген сұрағы сол бойы жауапсыз қалды. Айтуларынша, білім ордасында карантин жарияланбаған.
СЭС, яғни мекеменің қазіргі атауы тұтынушылардың құқығын қорғау басқармасының мамандары да қажетті дезинфекциялық шаралар толығымен жасалды дегеннен танбады.
Десе де, мектеп қабырғасында Кох таяқшасының болғаны мен дезинфекцияның ата-аналардан жасырын түрде жүргізілуінің себебін мекеме өкілі сол қалпында түсіндіре алмады. Ал ашынған оқушылардың жақындары болса, соңғы шараларға дейін барамыз дегенді алға тартып отыр. Айта кетейік, бүгінде елімізде туберкулез дерті бойынша Атырау қаласы алдынғы қатарда. Дәрігерлер мұны халықтың қоғамдық әлсіздігімен байланыстырып отыр. 70 пайызы шалдыққандар - жұмыссыздар. Ең қорқыныштысы, ата-аналардың аталмыш дертке қарсы екпеден бас тартуы аймақта аурудың жайылуына әкеп соқтыруы мүмкін. Ал бұл ұлт қауіпсіздігіне қарсы болып келеді -дейді ақ халаттылар.

свернуть