Ел болып електен өткізген конституциялық реформаны бүгін Парламент екінші оқылымда қарап, бірауыздан бекітті.
Қос палатаның бірлескен отырысы бас-аяғы жарты-ақ сағатқа созылды. Келте қайырыпты деуге негіз жоқ. Заң жобасын депутаттар өткен аптаның жұмасында жіті талдап шыққан. Сенбі, жексенбі де демалған жоқ.
Бірінші оқылымдағы ұсыныстарды саралап, жүйеге келтіріп, бүгін дауысқа салды.
Конституциялық реформа – соңғы бір жарым ай бойы халық жиі естіп жүрген тіркес. Жалпақ жұртқа жария етудің жөні бар әлбетте. Соның арқасында құжат ел мүддесіне сай етіліп, Парламенттің назарына ұсынылды. Өткен аптадағы бірінші оқылымнан кейін де біршама ұсыныс түскен.
Нұрлан Әбдіров, ҚР Парламенті Мәжілісінің депутаты:
-Жалпы 26 ұсыныс депутаттардан, комитеттерден, фракциялардан, депутаттық топтан түсті. Оның 26-сының 10-ын қабылдадық.
Дархан Кәлетаев, ҚР Парламенті Сенатының депутаты:
-Менің ұсынысым Елбасының тарихи рөлін Конституцияда айтып кету туралы болды. Өздеріңіз көріп отырсыздар, бүгін заң конституциялық өзгерісте толық көрсетілді.
Конституциялық реформаның діттегені – демократиялық үрдістерді дамыту, халық билігін нығайту. Дей тұрғанмен, елде президенттік басқару сақталады.
Светлана Бычкова, ҚР Парламенті Мәжілісінің депутаты:
-Конституцияның беріктігінің кепілі – Президент. Ата заңға өзгерістер енгізілгенімен, елімізде президенттік басқару жүйесі қала береді.
Икрам Адырбеков, ҚР Парламенті Сенатының депутаты:
-Ел Президентінің қызметінің негізгі бағыттары сыртқы саясат пен еліміздің ұлттық қауіпсіздігін қамтамасыз ету болып табылады. Бұл бүгінгі заманның өте өзекті мәселесі. Бүгінгі замандағы қауіп-қатерден сақтауға, сонымен қатар халықаралық қоғамда Қазақстанның беделі мен ықпалын көтеруге барынша мүмкіндік жасайды деп ойлаймын.
Ақан Бижанов, ҚР Парламенті Сенатының депутаты:
-Біздің мемлекетіміздің одан әрі дамудың ең бірінші жолы – демократиялық процестер. Осыған орай Парламентіміз өзінің шешімімен, Елбасының ұсынысын қолдай отырып, Елбасының кейбір өкілеттіліктері Парламентке және Үкіметке беріліп отыр.
Бірлескен отырыста депутаттар заң жобасын қабылдады. Енгізілген өзгерістер күшіне енген сәттен бастап, Қазақстан демократияның жаңа деңгейіне нық қадам жасамақ. Әрі атқарушы билік әлеуметтік мәселелерді шешудің тиімді жолдарын іздеп, халықтың сенімінен шығу үшін нақты әрекетке кіріспек.
Авторлары: Достық Талғатұлы, Серік Қоңырбаев, Арман Данышбаев
