للقراءة:
عمري محطة فاتها قطر الأحلام
قلت انتظر لكن تأخر وصوله
بكره يجي بكره يجي .. وانتهى العام
وأنا انتظر بكره وأراقب حلوله
أيام مرتني .. وعدتني أعوام
والعمر ساعة والعقارب عجوله
تمضي على رزنامتي دون اقدام
تمضي وتمضي والصبر في وفوله
حتى لمحتك حلم بعيون الأيام
أروع من تلال الخيال وسهوله
وأبعد من الواقع وأقرب للأوهام
وأعظم من أعظم شي ممكن أقوله
أذكر شهقت وقلت يادين الاسلام
وشلون أجل يوسف وجماله وزوله
منتي بجنيه ولا إنس ما دام
منتي بحورية ولا في رسوله
أنا اشهد إنك جيتي بلحظه إلهام
واحساس شاعر ما تمكن يقوله
كم أم انتي احملت بك؟ وكم عام
مثل البشر معقول؟ جيتي بسهوله
الله خلق من طين .. الاجسام
وانتي من زهور الربيع وحقوله
جلدك حرير وجسمك رخام برخام
واحساسك ارهف من دلال الطفوله
قولي أبعرف جسمك انتي به عظام
ولا بجسمك لغز يخفي حلوله
لا تضحكين بضحكتك اسمع أنغام
تجبر سحاب الصيف يرخي حموله
وأشوف نجد بضحكتك تقهر الشام
والشام يرجي ضحكتك طول حوله
وش عاد مصر بتفتخر به؟ بالاهرام
من عقب اهرامك ونيلك خجوله
انتي لو إنك جيتي بعهد الأصنام
بيتك قبايل يعرب تطوف حوله
دام البنات تشوفك وترمي أرقام
يخلف على اللي ينتمي للرجوله
لا شافك .. وما شاف في حكمه اعدام
الا مقدم ولعيونك عموله
يا أجمل من أجمل ما رسم يوم رسام
ويا أعذب من أعذب عزف لحن طربوا له
انتي قصيده دونها تقصر أقلام
والواقع بحسنك أبد ما تطوله
مهما يطول الوصف أوصافه أقزام
وجه الشعر شوفي ملامح ذهوله
انتي بجمالك لو ظهرتي بالافلام
مهما قصر دورك يكون البطوله
وأقسم بربي ان ظهرتي بالاعلام
صرتي حديث الناس في كل دوله
وراحت على يارا وميسا وأريام
وخضع لك الاعلام عرضه وطوله
الشاعر / يعقوب الهذال.
