Маңғыстаулық ғалым Марат Исекеев ойлап тапқан жел электр станциясы «ЭКСПО-2017» көрмесіне қойылады.
62 жастағы өнертапқыш алғашқы құрылғыны аймақтағы шаруа қожалықтарының біріне орнатып, сынақтан өткізді. Облысты электр қуатымен қамтып отырған кәсіпорын мамандары жобаға жоғары баға берді. Малшы үйінде тұрған құрылғыға небәрі 100 мың теңге жұмсалған. Сағатына 10 киловатт қуат көзін өндіріп тұр. Қалада мұндай станцияны үйдің төбесіне қоюға болады. Көпқабатты үйдің тұрғындарын электр энергиясымен толық қамтамасыз ету үшін қосымша екі қабат салынуы керек. Жел модульдері сонда орнатылады. Сөйтіп адамдар түгесілмейтін әрі қоршаған ортаға зиянсыз жолмен энергия алады. Бастысы, бұл құрылғы жел электр станцияларына қарағанда қуатты екі есе көп өндіреді.
Марат Исекеев, өнертапқыш, «Болашақ энергиясы» республикалық байқауының жеңімпазы:
– Көп қатарлы, көп деңгейлі үйдің ішінде орналасқан, бірақ едені мен төбесі ғана бар, қабырғалары жоқ. Суға платина қояды ғой, дәл сол сияқты біз желдің жолын жауып, желді стансаның ішінен өткізіп, жел энергиясын электр энергиясына ауыстырамыз. Өтпе жел арқылы алған желдің жылдамдығы көбейеді.
