Себебі өткен күз жауын-шашынды болса, қыста қардың қалыңдығы орташа көрсеткіштен әлдеқайда асып түсті. Бүгінде елді мекендерде қарды шығаруға, үйлердің іргесін аршуға, су жолдарын тазалауға жүздеген техника, мыңдаған адам жұмылдырылған.
Тасқын сумен күреске деп облыстың төтенше жағдайлар резервіне 546 миллион теңге бөлініп отыр.
Ерденбек Жылқайдарұлы, тілші:
-Су тасқыны болу-болмауы күннің күрт жылынуы мен көктемгі жауын-шашынға, бастауын Ресейден алатын трансшекаралық өзендердегі су деңгейі секілді факторларға тікелей байланысты. Дегенмен қамданғанның қапы қалмайтынын естен шығармаған абзал. Сондықтан да мамандар қардың қалыңдығы мен жердегі ылғалдың молдығына қарап, су тасқыны болады деген болжам айтып отыр. Ақпандағы ақтүтек борандар ауыл-аймақтың ақ көрпесін әбден қымтап кеткені рас. Қазір үйлермен бірдей боп үйілген қарды шығару жұмыстары жүріп жатыр. Облыс орталығының өзінде қыс басталғалы 500 мың текше метр қар шығарылыпты.
Мұзафар Шамғонов, Орал қаласының тұрғыны:
-Айналаны тазалап, қорғанып жатырмыз. Шығарған қарды ДЭП-тың адамдары алып жатыр. Біз ауланың ішінен мүмкіндігінше шығарып жатырмыз.
Қуат Ерсайынов, «Жайықтазақала» ЖШС бөлім басшысы:
-Күнделікті 85 техника шығады. Атап айтсақ, 60 борт бар, 20 погрузчиктер және автогрейдерлеріміз бар. Тәулігіне 7-8 мың куб қар шығады. Екі ауысымда жұмыс жасап жатырмыз.
Сонымен қатар облыстағы 57 гидротехникалық нысанға түгендеу жұмыстары жүргізілді. Автожолдардың астындағы су өткізу құбырлары да тазаланды. Бөгеттерді бекітуге 15 млн теңге бөлінсе, Орал қаласындағы Зашаған кентінде көктемгі қар суын шығаруға арналған арықтар жүйесінің құрылысы аяқталды.
Орынбасар Бисенғалиев, Орал қалалық ТКШ бөлімінің бас маманы:
-Зашаған кентіндегі Сарытау, Көктем, Кең дала аудандарындағы еріген қар суларын Орал-Саратов тас жолымен Орал өзеніне қарай жүргізеді. Сонымен қатар 2016 жылы Жұлдыз шағын ауданында арық жүйесі жұмыстар жүргізілді. Ол жұмыстар биыл жалғасын табатын болады.
Орал қаласы үшін өзекті мәселенің тағы бірі – саяжайлар. Табиғи апат бола қалған жағдайда алдымен шаһардың айналасындағы осы аудандар тасқын судың астында қалмақ. Сол себепті қазір төтенше жағдай мамандары мен полиция қызметкерлері саяжайларда тұратын 12 мыңдай тұрғынға қапы қалмауды ескертуде.
Авторлары: Е. Жылқайдарұлы, Р. Ғазезов
