اليا تغيّبنا لنا عذر واسباب
وليا حضرنا حضورنا به مهابة
واليا تكلمنا صغىٰ عكف الاشناب
واليا فزعنا زال همّ الغلابة
"شامخ" تمادىٰ بغيبة "عقاب وحجاب"
كبر.. وصار الكل يحسب حسابه
أسوء عواقب غيبة الذيب لا غاب
لا صارت الخرفان فيها ذيابة
يا منتظر لي طيحةٍ تكسر النّاب
وترتاح فيها من صريف الكتابة
أبشرك حنا بحمىٰ ربّ الارباب
وليا جفونا الناس لذنا بجنابه
بامره نأدب كل حايف وكذاب
ونصون مجد ربوعنا والقرابة
كم معتدي قبلك تركناه منصاب
وكم من صويبٍ ما برىٰ من صوابه
كانك تروم المجد افعل بالاسباب
شمِّر عن زنودك وشد العصابة
الله خلق كل الأوادم من تراب
والهافي اللي ما تعدا ترابه
حنا غرزنا بقمّة العز مخلاب
ومن فعلنا التاريخ سجّل كتابه
لعبيد نرجع يا عريبين الانساب
تاريخنا كل القبايل تهابه
#يوسف_العبيدي
