Astarada narkomaniyaya qarşı mübarizə tədbirlərinə başlanılıb
Astarada yeniyetmə və məktəbliləri narkotik vasitələrin alüdəçiliyindən qorumaq üçün təbliğat və təşviqat işlərinə başlanılıb. Rayon Polis Şöbəsinin əməkdaşları , Ombudsman aparatının Cəlilabad Regional Mərkəzinin rəhbəri və rayon təhsil şöbəsinin iştirakı ilə ümumtəhsil məktəblərində keçirilən maarifləndirmə seminarında məktəblilərə narkotik vasitələrin insan həyatını necə məhvə sürüklədiyindən söz açılıb. Bildirilib ki,narkotik vasitələrin alüdəçisinə çevrilən insan, istəsə belə, bu asılılıqdan qurtula bilmir. Tədbirdə çıxış edənlər bildirib ki, bu gün dünyanın baş bəlasına çevrilən narkomaniya təəssüflər olsun ölkəmizdən də yan keçməyib.Ötən il rayon ərazisinə İran İslam Respublikasından qaçaqmalçılıq yolu ilə gətirilən 15 kiloqrama yaxın müxtəlif növ narkotik vasitə, Rayon Polis Şöbəsinin əməkdaşları tərəfindən dövriyyədən çıxarılıb. Hazırda rayonda yaşı 18-dən 50-ə kimi olan 179 narkoman qeydiyyata alınıb. Gənclər və yeniyetmələr arasında bu cür maarifləndirmə seminarlarının məktəblərdə il boyu keçirilməsi nəzərdə tutulur.
