6 ministrat teknikë të Partisë Demokratike dhe zëvendëskryeministrja Ledina Mandia kanë bërë gati dorëheqjet të cilat pritet t’i zyrtarizojnë të enjten. Burime pranë Partisë Demokratike konfirmuan për televizionin Klan se akti formal i largimit nga qeveria të ministrave të opozitës erdhi menjëherë pas përfundimit të raportit për standardin e zgjedhjeve.

Ministrat teknikë të Partisë Demokratike u bënë pjesë e kabinetit “Rama”, pas marrëveshjes së 18 majit, si garanci për të monitoruar administratën publike gjatë fushatës si dhe standardin e zgjedhjeve te 25 Qershorit.

Qëndrimi i tyre tre muaj në qeveri solli kritika të forta si brenda radhëve të demokratëve, ashtu edhe mes aleatëve të opozitës.

Kryerepublikani Fatmir Mediu dhe Dashamir Shehi i kërkuan Lulzim Bashës të tërheqë urgjentisht ministrat teknikë dhe të shkëpusë lidhjet me kryeministrin Edi Rama. Sipas tyre mbajtja e ministrave në qeveri e bën opozitën të papranueshme, qesharake dhe kompromentuese.

Pas fitores së socialistëve në zgjedhje edhe Kryeministri Rama kërkoi largimin e ministrave teknikë. Në kundërpërgjigje Lulzim Basha u shpreh se ministrat e tij i kishin gati dorëheqjet dhe se me përfundimin e raportit për zgjedhjet do t’i dorëzojnë ato.

свернуть