Қазақстанда пәтер сатып алуға деген сұраныс азайған. Бұл азаматтардың баспанамен толық қамтылғандығынан емес, қомақты қаражаттың жоқтығынан. Өйткені, бүгінгі таңда тұрғын үйдің ай сайынғы төлемі мен алғашқы жарнасы айтарлықтай қымбаттаған. Ал мұндай қаражатты төлеп тұру үшін әр отбасы бірнеше жерде жұмыс істеуі қажет. Мемлекеттік бағдарламалармен пәтер алуға да көбінің қолы жете бермейді. Қазақстандағы ипотекалық бағдарламалар неге тиімсіз? Оны қалай қолжетімді қылуға болады? Руслан Жасұланұлы сарапшылардың пікірін білген еді.
Қазақстанда қазіргі күні 500 мыңнан артық адам баспанаға мұқтаж. Ал олардың әрбірінің отбасы барын ескерсек пәтерсіз жүрген адамдардың саны тіпті миллионнан асады. Әлеуметтік осал топтарға жататын азаматтар үшін елімізде «Бақытты отбасы» бағдарламасы бар. Онымен пәтерді көпбалалы отбасылар, бірінші және екінші топтағы мүгедектер, жетім және ата-ана қамқорынсыз қалған балалар, мүмкіндігі шектеулі баласы бар отбасылар 10 пайыз бастапқы жарна салып, 2 пайыздық несиемен алады. Ал баспана кезегіне тұрғандар «Шаңырақ» бағдарламасы арқылы 5 пайыз несиемен пәтер алуға өтініш бере алады. Онда да 10 пайыз бастапқы жарна қажет. Бірақ көпшілік «Шаңырақтың шарапатын» көре алмайтынын айтады. Өйткені кезегін 20 жылдан бері күтіп жүргендер де бар.
МАРАТ ЖАРБУЛОВ, ҚР ИИДМ тұрғын үй құрылысы мен инженерлік-коммуникациялық инфрақұрылымды дамыту басқармасының бас сарапшысы:
– Министрліктің негізгі мақсаты - әлеуметтік осал топтар мен жергілікті әкімдіктерде баспана кезегінде тұрғандарға қолдау көрсету. Ең басты талап - басында баспанасы болмауы керек. Яғни, мемлекет бұл азаматтардың несиесін субсидиялайды. Басқа адамдар нарықтағы ипотекалық өнімдер бар. Соларды пайдалана алады. Олардың пайыздық мөлшерлемесі 20 пайызға дейін барады.
Кез келген тұрғынның несиеге баспана алуына мүмкіндік беретін екінші деңгейлі банктер ұсынған "Ұмай" және "7-20-25" бағдарламалары бар. Бірақ, бұлардың да пайыздық мөлшерлемелері едәуір жоғары. Азаматтар несие мөлшері 10 пайыздан басталатын бұл бағдарламалар көпке бірдей қолжетімді емес дейді. Мәселен, кейбірі 20 пайыз бастапқы жарнаны жинай алмайды. Енді бірінің екінші деңгейлі банктердің 10-15 пайыздық несие мөлшерлемесін төлейтін мүмкіндігі жоқ.
Ал Қазақстан құрылысшылар одағының төрағасы Талғат Ерғалиев биыл баспанаға сұраныс азайғанын айтады. Оның себебі, қарапайым халықтың пәтер сатып алатын мүмкіндігі жоқ. Қымбатшылық қысқан заманда тұрғындардың табысы төмендеп бара жатыр деген ол, басында баспанасы жоқ халыққа бастапқы жарнасыз үй алуға мүмкіндік жасау керек екенін айтады. Ал несие мөлшерлемесін 5 пайыздан асырмауға мемлекеттің мүмкіндігі жетеді деген пікірде.
ТАЛҒАТ ЕРҒАЛИЕВ, ҚР құрылысшылар одағының төрағасы:
– Мынау беріліп жатқан несиелердің пайызы өте биік. 14 пайыз. Кейбірі одан да асып кетеді. Ол дегеніңіз ипотека алған азамат айына 200 мың, тіпті 300 мың несие төлеу керек. Ол қарапайым азаматтың қолынан келмейді.
Бірақ индустрия министрлігінің өкілдері алдағы уақытта қолжетімді бағдарламаларды іске қосу әзірге қарастырылмағанын айтады.
Бізді әлеуметтік желіде оқыңыздар:
Информбюро 31 [ Ссылка ]
Informburo kz [ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
Біздің сайт: www.31.kz и www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
