Quba Rayon İcra Hakimiyyətinin təşkilatçılığı ilə rayonun şəhid övladları üçün 31 Dekabr - Dünya Azərbaycanlılarının Həmrəyliyi Günü və Yeni il bayramı münasibətilə şənlik təşkil olunub. Tədbir Ümummilli Lider Heydər Əliyevin, Vətən uğrunda canlarını fəda etmiş şəhidlərimizin, həmçinin 25 dekabr 2024-cü il tarixdə baş verən təyyarə qəzası nəticəsində həlak olanların əziz xatirəsinin dərin ehtiramla yad edilməsi ilə başlandı. Tədbirdə Quba Rayon İcra Hakimiyyətinin məsul şəxsləri iştirak edib. Tədbir iştirakçılarına Quba Rayon İcra Hakimiyyətinin başçısı İlqar Mahmudovun təbrikləri çatdırılıb və onlara bayram hədiyyələri təqdim edilib. Çıxış edənlər bildirdilər ki, Dünya azərbaycanlılarının həmrəyliyi gününün təsis edilməsi Ulu Öndər Heydər Əliyevin adı ilə bağlıdır. Dünyanın hansı nöqtəsində yaşamasından asılı olmayaraq ölkəmiz bütün azərbaycanlılar üçün doğma Vətəndir. Bu müqəddəs amal dünya azərbaycanlılarını möhtərəm Prezidentimizin ətrafında daha sıx birləşdirdi, Müzəffər Ali Baş Komandan cənab İlham Əliyevin rəhbərliyi altında Şanlı Ordumuz 44 günlük Vətən Müharibəsində Zəfər qazanaraq respublikamızın ərazi bütövlüyünü, ötən ilin sentyabr ayının 19-u və 20-də isə 24 saatdan da az müddətdə davam etmiş antiterror əməliyyatında ölkəmizin suverenliyini təmin etdi. Bayram şənliyi bir-birindən maraqlı və rəngarəng nömrələrlə davam etdi. Şəhidlərin ailə üzvləri hər zaman dövlətin qayğısı ilə əhatə olunduqları üçün ölkə Prezidenti İlham Əliyevə, Birinci vitse-prezident Mehriban xanım Əliyevaya minnətdarlıqlarını ifadə ediblər.
#Quba #şəhidövladları #Yeniil #HəmrəyliyiGünü #31Dekabr

свернуть