#qarabağ #qaçqın #mənzil #ev #qaçqınkom #todaypress #todaypresstv #xəbərlər #sosial #siyasət #idman #maraqlı #iqtisadiyyat #faydalı #sonxəbər #gündəm #aktual #news #video
Yay aylarında insanlar istirahət etmək üçün qalmağa hotel, evlər axtaran zaman tez-tez qarşılarına işğaldan azad edilmiş ərazilərdəki mənzillərin sakinlər tərəfindən günlük kirayə verilməsi çıxırdı. Qiymət isə əsasən 150-200 manat arası dəyişirdi. İddialara əsasən, bəziləri işğaldan azad olunan ərazilərə kütləvi turist axınından sui-istifadə edir və bu evləri yaşamaq yox, yeni gəlir mənbəyi kimi görürlər. Özləri isə mənzilləri kirayə verib, paytaxta qayıdırlar. Mövcud olan iddiaları dəqiqləşdirmək üçün bir sıra elan saytlarına baxdığımız zaman qarşılaşdığımız mənzərə deyilənləri təsdiq etdi.
Məsələylə bağlı TodayPress-ə danışan politoloq İlyas Hüseynov bildirib ki, Vətən müharibəsindən sonra Azərbaycan dövləti keçmiş məcburi köçkünlər üçün evlər inşa etməyə başladı. Bu sözsüz ki, həmin şəxslərin öz doğma torpaqlarına tez bir zamanda qovuşmaları üçün nəzərdə tutulmuşdu:
“Həmvətənlilərimiz uzun illər bir xəyalla yaşayıblar ki, bir gün nə vaxtsa həmin yerlərə qayıdacaqlar. Təəssüflər olsun ki, müsbət hallarla yanaşı, son dönəmlər mənfilərə də rast gəlirik. Belə ki, oradakı evlərini kirayə verərək, Bakıya qayıdan bir sıra vətəndaşlarımızın olduğu üzə çıxdı. Sözsüz ki, bu şəxslərin sayı çox azdır. Vətəninə, torpağına sadiq şəxslər isə həddindən artıq çoxdur. Buna görə də bu hallardan sui-istifadə edən həmin şəxslər araşdırılmalı və müvafiq addımlar atılmalıdır. Çünki, həmin evlərin arzusunda, həsrətində olan yüzlərlə vətəndaşımız var ki, onların hüquqlarının pozulmasına imkan verilməməlidir”.
Qaçqınların və Məcburi Köçkünlərin İşləri üzrə Dövlət Komitəsindən (Qaçqınkom) TodayPress-in sorğusuna cavab olaraq bildirilib ki, komitənin əsas işi insanların öz ata-baba yurdlarına qayıdışını təmin etməkdir. İlkin mərhələdə Bakıda şəraiti çox pis olanların qayıdışı təmin olunur. Onların Bakıda digər mənzillərə sahib olmadıqları komitə tərəfindən dəqiqləşdirilib.
Qeyd edək ki, əvvəllər də Bakı və ətraf ərazilərdə məcburi köçkünlər üçün salınan qəsəbələrdə mənzilin başqasına kirayə verilməsi hallarına rast gəlinib.
Bunun üçün də müvafiq qurum tərəfindən reydlər keçirilir, ev verilən şəxslərin həmin mənzillərdə yaşayıb-yaşamadığı təsbit edilirdi. Dövlətin verdiyi evdə yaşamayıb, ondan qazanc məqsədilə istifadə edən və kirayə verənlər aşkarlanırdısa, həmin mənzil dərhal geri alınır, ehtiyacı olana təqdim edilirdi. Eyni təcrübənin indiki dövrdə də tətbiq ediləcəyi ilə bağlı hələ ki, dəqiq məlumat olmasa da, bu müsbət addım olardı.
