" فراقك فعل مش فاضح "
حبيته من قلبي ، ملقيتش غير ذله
إذا كان حبيبك عسل ، متلحسوش كله
هددتني بغياب ، وأنا كنت مش قده
فـ مسكت فيك وبغلب ، وقولت متسبنيش
ظنيت فـ قلبك خير ، وانا ظني جه علي مفيش
وقولت عني كلام والله مش فيا
وشفتني ببكي ، رديت بسخرية : " معلش يا ضحية "
صوت قسوتك يومها سمعته باستغراب ..
مين الي علي التليفون ! انت الي حبيتك ؟
الصوت خارج منك بس الكلام من مين !
مين انت فهمني ! آخرتها تهملني ؟
آخرتها تنهيها بالكسرة دية ليا ..
آخرتها تنهيها بكلام مهوش فيا ؟
جيتلي وارضك بور ، فـ زرعت فيك م الورد ..
ووهبت قلبك دفي ، كيف الكوفية فـ برد ..
اديتني ايه انت !؟
غير الوجع والخوف ، اديتني ايه غير حزن ع المكشوف
نقطة الضعف الي فيا عريتها قدامك وأنا ظني بيك كان خير
أنك هتحميني ، أيدي الي وجعتني مسكتني منها وحلفت تنهيني !
ركنت حلمي ومشاغلي وكل شئ لجلك ، لجل اني افضالك
وجي دلوقتي تعايرني بأفضالك ! وتقولي اصلي عملت !
عملت ايه ليا ، غير كام فرح يتعد ، وحزن اضعافه !
طلعت بيك السما ونزلت بيا الارض ..
وقولتلك اني سنداك ليوم العرض ..
واحتاجت لوجودك ملقيتش كتفك سند ..
ملقيتش فيك الضهر ، زاد الغياب عن شهر
وأنا كنت محتاجة إن انت تبقالي !
كان المكان خالي ومفيش سوي قلمي
فـ سردت من ألمي ، الشِعر للمخاليق
دانا كنت خير صديق وكنت ليك امك
وكنت ليك الونس وحبيبة بتضمك ..
هديت لقلبك ورد ، هجيت فـ قلبي الشِعر
وادتني ايه غير شوك ؟!
دانا كنت ليك مركبة بتعدي بيك م الوجع ..
وعالجت قلبك لقيتني بحزن واخاف واتوجع ..
وطلبت تنجدني ، مفتحتليش إيدك ..
وسبتني بغرق ! كان إيه لزوم كدبك
او وعدك الزايف ، وان الحياة وردي
وإن البداية العظيمة فـ اي شئ حلوة
بقالك قد ايه ؟ مقولتليش حلوة ولا حلو فستانك .. !
مجبتليش وردة ولا قولتلي شبهك !
بقالك قد ايه ؟ مبعتليش مثلا رسالة تقول " وحشتيني "
اهملت ليه بدري ، مليت وجودي خلاص ؟
دانا يعني حبيتك ، مديتش غير الحب .. ؟
عودت قلبك ع الإهتمام مني ، فـ بقيت بتهمل
فـ بقيت بتبعد ، فـ بقيت تهدد بالفراق والهجر !
وسامحت قلبك وقولت فات وانقضي ..
كل الي عدي ومضي هنساه عشان حباك ، وهنسي غلطاتك ..
اتفه خلاف بينا .. بتذلني علي غلطة غشمي ارتكبها من زمن !
بيعت الي بينا بدون تمن وبعدت ، اسود يا قلبك قاسي مبينساش .. !
بيعت الي بينا بلاش ، وقولتلي دة نصيب ..
أمرك عجيب والشك زاد فيا ، بطلت تعشقني
ولا لقيت غيري ؟
كتر أوي خيري علي الصبر والله ..
دانا صبري طال ايوب ، وبردوا مجزعتش ..
غيطان قلبك بأيدي زرعتها وسمعت صوتك بيقولي مزرعتش
" كفران عشيرك " زاد وبتنكر المعروف وتقول كلام باطل !
كل الكلام عاطل قدام جحود قلبك ..
روحي الي شبعت وجع بيقل فيها الحيل ..
بتغش ليه ف الكيل ؟ وتحط ماية فـ عسل
عديتها والله حفظاً لماء وجهك حفظاً لعلاقتنا ..
لكن تحط السم !! صعب إني اعديها ..
صعب اني أشوف سمك بيقتل كل شئ فيا ..
واسقفلك !
طيبتي الغبية بتتقلب لعنة ، فـ خد بالك
انا كنت بقيالك ، مش صعب إني اذيك ..
قلبي الي عاش يحميك ، ويبني فيك لتقوم ..
كل الي نابه الوجع وان انت مش هتدوم ..
قربت ليه لما انت ناوي علي الفراق ؟
قلبك غريب ضل الطرق ، جبتك وسكنتك فـ روحي
جعلت منك إكسير حياة ليا ..
وآخرتها ؟
قولت عني كلام والله مش فيا ..
قولت اني وحشة وقلبي مش ولابد
وإني مصونتش حبك الطاهر !
كان كل شئ ظاهر ، وأنا الي كنت بصون
وانا الي كنت بهون علي قلبك المذنب
جيت قولتلي بقسوة كلام سايب علامة حزن جوايا
وكنت دواك برغم أنك مفيش مرة تكونلي علاجي ودوايا
كسرت فـ قلبي بجحودك وغيبت بدون سبب واضح !
فراقك فعل مش فاضح ، فراقك خير ، فراقك ليا قواني يا حب تعبني يا اناني ، هحن يجوز وهشتاقلك لكن والله ما هعاني .. بفعل الوقت هتناسي وهتعلم بفعل الصدمة هستقوي وهتكلم وهلعن فـ الوجع جهراً ..
هكون اقوي وانا لوحدي بكون اضعف وأنا وياك ..
رُب خيراً لم تنل له كان شراً لو اتاك ..
