Бүгін Астанада Шанхай ынтымақтастық ұйымы Қауіпсіздік кеңесі хатшыларының он екінші кездесуі өтті.
Еске сала кетсек, бұл халықаралық ұйымға қазір Қазақстан төрағалық етуде және еліміздің бұл жұмысы жоғары бағаланды. Маусым айында Астанада өтетін саммитке дайындық барысы талқыланды. Кездесуде аймақтағы қауіпсіздік пен тұрақтылық жағдайы мен ұйым мүшелерінің көбейетіні ескеріліп, өзара ықпалдастық тетіктерін жетілдіру жолдары да қаралды. Қатысушы жақтар терроризм, сепаратизм мен экстремизмге, трансұлттық ұйымдасқан қылмысқа, қару-жарақ пен есірткі заттардың заңсыз айналымына қарсы әрекет ететін органдардың өзара тығыз әрекеттесуі жөнінде келісті. Мұнан өзге, саммитте қабылданатын терроризмге қарсы мәлімдемені тездетіп жасаудың маңызды екені айтылды. Кездесу қорытындысы бойынша хаттама қабылданды.
Владимир Жұмақанов, ҚР Президентінің көмекшісі, ҚР Қауіпсіздік кеңесінің хатшысы:
-Ұйымның 2017-2022 жылдарға арналған экстремизмге және есірткіге қарсы әрекет ету стратегиясы жөніндегі Конвенциясын келісудің маңызды екенін атап өттік. Қазақстан аймақтағы бейбітшілік пен тыныштықты сақтаудағы Шанхай ынтымақтастық ұйымының әлеуетін арттыруға үлес қосуға дайын.
