TIRANE- Po prisnin klientët për të këmbyer 1 kg kokainë me para në qendër të kryeqytetit në rrugën “Vllazën Huta”, prangosen në flagrancë dy trafikantë si dhe shpallet në kërkim bashkëpunëtori i tyre.
Prej disa javësh policia e Tiranës në rrugë operative kishte marrë informacion për shtetasit Gjergji Gjinaj dhe Ismail Allushi se pas dënimeve të mëparshme ishin rikthyer aktivitetit të paligjshëm të trafikut.
Nën operacionin e koduar “January” agjentët e antidrogës kanë ndërhyrë mbrëmjen e djeshme ku fillimisht është ndaluar Allushi si personi që siguronte drogën, kokainë dhe heroinë e më pas Gjinajn.
Ky operacion nuk ka mundur të prangosë të tre trafikantët pasi 41 vjecari A.K ka mundur të largohet duke çarë rrethimin e policisë.
Tashmë ai është identifikuar dhe blutë kanë bllokuar të dhënat e tij në sistemin TIMS për të mos e lejuar të largohet jashtë vendit.
Veç drogës të dyshuarve i janë sekuestruar dy automjete, 6750 euro 12 aparate celularë, dhe një armë pushkë sportive.
