Bakıda BMT Modeli üzrə ikinci Milli Konfrans keçirilir. Konfransda 20-dən çox universitet, akademiya və məktəbi təmsil edən 250 gənc diplomat iştirak edir. Gənclər və idman naziri Azad Rəhimovun sözlərinə görə, BMT modeli hərəkatının dəstəklənməsi “Azərbaycan gəncliyi 2017-2021-ci illərdə” Dövlət proqramına daxil edilib. Konfransın məqsədi gəncləri bir araya toplayaraq onları bu sahədə fikir mübadiləsinə cəlb etməklə təcrübə toplamasına, gələcəkdə layiqli diplomat kimi Azərbaycanı təmsil etməsinə töhfə verməkdir.
BMT-nin Azərbaycandakı rezident əlaqələndiricisi Qulam İshaqzai bildirdi ki, Azərbaycanda BMT Modeli hərəktının genişlənməsi istiqamətində mühüm işlər görülüb. Ali təhsil müəssisələrində BMT Modeli haqqında təqdimatlar keçirilib, MUN klubları yaradılıb, universitet səviyyəsində və universitetlərarası konfranslar təşkil olunub: «BMT Modeli ilə məşğul olan zaman siz xarici dil, danışıq, təqdimat, əlaqə, rəsmi yazı və ünsiyyət bacarıqlarınınzı inkişaf etdirirsiniz. Burada gənclər Birləşmiş Millətlər Təşkilatına daxil olan qurumlar, ölkələr haqqında, həmçinin müzakirə edilən mövzular barədə biliklərini təkmilləşdirəcəklər. Müzakirə olunacaq mövzular Birləşmiş Millətlər üçün olduqca önəmli sosial əhəmiyyətə malikdir. Gənclər dünya diplomatiyası haqqında görüşlərini inkişaf etdirəcək, dayanıqlı inkişaf və iqlim dəyişikliyi mövzularında ideya və yanaşmalarını nümayiş etdirəcəklər”.
Qarşıdakı günlərdə konfrans iştirakçıları Myanmadakı vəziyyət, Kriptoməzənnənin statusu: perspektivlər və risklər, həmçinin iqlim dəyişikliyinin insan sağlamlığına təsiri mövzularında müzakirələr aparacaqlar. Gənclərin həll yolları təklif edəcəyi gözlənilir.
BMT Modeli üzrə ikinci Milli Konfrans dekabrın 21-dək davam edəcək.
