Azərbaycan Respublikasının Prezidenti cənab İlham Əliyevin “Şəhid ailəsi üçün Azərbaycan Respublikası Prezidentinin təqaüdünün artırılması haqqında” 30 yanvar 2019-cu il tarixli Fərmanı ölkəmizdə şəhid ailələrinin sosial müdafiəsinin gücləndirilməsinin, onların rifah halının yaxşılaşdırılmasının dövlət başçısının uğurlu sosial siyasətinin əsas istiqamətlərindən olduğunu bir daha təsdiq edir.

Fərmana əsasən, şəhid ailələrinin sosial müdafiəsinin gücləndirilməsi və onlara dövlət qayğısını artırılması məqsədilə şəhid ailəsi üçün Azərbaycan Respublikası Prezidentinin təqaüdünün aylıq məbləği 58 manat artırılaraq 2019-cu il fevralın 1-dən 300 manat müəyyən edilib. Həmin Fərman Azərbaycan Respublikası Prezidentinin aylıq təqaüdünü alan 12 mindən çox şəhid ailəsini əhatə edəcək.

Ümumilikdə, 2007-ci ildən şəhid ailəsi üçün Azərbaycan Respublikası Prezidentinin aylıq təqaüdünün məbləği 3 dəfə artırılıb.

Yanvarın 28-də Prezident cənab İlham Əliyev və birinci xanım Mehriban Əliyevanın Prezident Sarayında şəhid ailələri ilə görüşü həmin ailələrə yüksək səviyyədə diqqət və qayğının növbəti təzahürü kimi ümumən ictimaiyyət tərəfindən böyük rəğbət hissi ilə qarşılandı.
Prezident cənab İlham Əliyev tərəfindən elə həmin gün imzalanmış Fərmanla şəhid ailələri üçün birdəfəlik ödəmənin (11 min manat) verilməsi prosesinin əhatə dairəsinə ölkəmizin ərazi bütövlüyü uğrunda 1997-ci ilin avqust ayının 2-dək şəhid olmuş əlavə 2725 şəhidin (o cümlədən vərəsələri 11 min manatdan az sığorta ödənişi almış 2264 şəhid hərbi qulluqçunun və 461 şəhid polisin) vərəsələri də daxil edilib. Bununla da birdəfəlik ödəmənin verilməsi prosesi artıq 12268 şəhidin vərəsələrini əhatə edib və həmin ödəmə üçün nəzərdə tutulan vəsaitin məbləği 135 milyon manata yüksəlib. Artıq 3758 şəhidin 5144 vərəsəsinə birdəfəlik ödəmənin verilməsinə dair qərar qəbul olunub və onlardan 3100 şəhid üzrə 4200 vərəsəyə ödəniş həyata keçirilib. Cari il ərzində digər vərəsələr də birdəfəlik ödəmə ilə təmin olunacaq.

Azərbaycan Prezidenti İlham Əliyevin 28 yanvar 2019-cu il tarixdə imzaladığı digər bir Fərmanla isə Qarabağ müharibəsi əlilləri və şəhid ailələri üçün mənzillərin alınması məqsədilə 35 milyon manat vəsait ayrılıb. Bu da qeyd olunan kateqoriyaların mənzillə təminatı tədbirlərinin uğurla və yüksələn xətlə davam etdirilməsinə imkan yaradır. Qeyd edək ki, ötən dövrdə şəhid ailələrinə və müharibə əlillərinə 6654 mənzil, o cümlədən, 2018-ci ildə nəzərdə tutulduğundan 3 dəfə çox olmaqla 626 mənzil verilib. 2019-cu ildə isə həmin vətəndaşlara azı 800 mənzil təqdim olunacaq.

свернуть