Тургенев көшесіндегі 98-үйдің 5-ші ғимаратының төбесінен су сорғалап тұр. Тургенев көшесіндегі бұл үйдің 9-қабатында 18 пәтер бар. Бәрінің де тұрғындары тесік төбенің зардабын тартып келеді. Күз, көктемде шатырдан су ағады. Ылғалдан осы қабаттағы дәліздің едендері шіри бастаған. Пәтер иелері бір жарым жыл бұрын жиналып, 450 мың теңгеге төбені бір қабаттаған. Пайдасы болмады. Шатырды толықтай жөндеу үшін кем дегенде 2-3 миллион теңге керек, дейді үйдің техникалық жағдайына жауапты Майра Исаева. Әр пәтерден 20 мың теңге шығады. Бұл ақшаны әрең күнелтіп отырған тұрғындар жинап бере алмады. Қалалық тұрғын үй инспекциясының басшысы Жұлдызбек Бисембин бұл үй терможаңғыртудан өтетін ғимараттар тізімінде бар дейді. 81-ші болып тіркелген. Енді кезек күту керек. Жоспар бойынша, терможаңғырту бағдарламасы арқылы жылына 4-5 үй жөнделеді. Есептесек, Тургенев көшесі, 98-үйдің кезегі жеткенше әлі 16 жыл бар.
