Жамбыл облысында ел малын бағатын жер таппай жүр. Себебі ауыл маңындағы барлық жайылым жер жалға берілген. Тұрғындардың айтуынша, қожалық иесі жеріне түскен түлікті өз малына қосып, қайтармай қояды екен. Ал биыл бизнесмен ауыл айналасындағы жерін айналдыра ор қаза бастаған.
Ауыл тұрғындарының жалғыз проблемасы осы. Себебі қазір елдімекен маңында мүлде жайылым жер жоқ. Маңайдағы жерді жалға алған кәсіпкер меншігіне мал түссе, бірден өз қорасына қамап, қайтармайды дейді ашулы ел. Ал биыл талай жыл төрт түлікті өргізген алқапты жыртып, егін егіпті.
НҰРБОЛАТ ЖАҢАБЕКҰЛЫ, Тілші:
– Мына ауыл іргесіндегі 24 гектар егістік алқабы жеке кәсіпкер меншігіндегі көп жердің кішкентай бір бөлігі ғана дейді тұрғындар. Айтуларынша, ол осыдан үш апта бұрын еккен егінін айналдыра ор қаза бастаған. Бұл туралы естіген ел жер басына келіп, техниканы тоқтатқан. Десе де қожалық иесі шамамен бір шақырымдай жерді қазып үлгеріпті.
Кәсіпкер 2004 жылы 5 мың гектардан астам жерді жалға алған. Бірақ тек 2019 жылы суармалы алқапты игере бастапты. Өйткені, мал басы көбейген сайын, тонналап жем сатып алу тиімсіз болған. Сол үшін ауыл айналасына арпа мен жоңышқа егіпті. Ал арықты ауылдастырына сес көрсету үшін емес, егістікті жаңбырлатып суару үшін қаздым дейді.
НАРИМАН МӘУЛЕНОВ, кәсіпкер:
– Жұрттың айтып жатқан арызы орынсыз, өйткені ол жер суармалы жер, оны суары керек, оны маған тиімді пайдалану керек. Біз оны біраз жыл меңгермегеннен кейін елдер соған малын жайған, үйреніп қалған оны жайылым жер деп.
Әкімдік өкілдері тұрғындар көтерген мәселе туралы біледі. Бірақ кәсіпкер жалға алған жерді тартып ала алмаймыз деді. Әрі, қожалық иесі де 250 гектарға жуық жайылым жерді мемлекет меншігіне қайтарып беруге келісіпті. Ал әзірге ауыл тұрғындары мен кәсіпкер арасындағы дау қашан басылары белгісіз. Себебі екі тарап та алған бетінен қайтпаймыз деп отыр.
Нұрболат Жаңабекұлы, Дәулетбай Нұрмахан
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#жер_дауы #жайылымсыз_ауыл #дау #наразылық
