Шымкенттің әуежайы маңындағы 200-ге жуық үй сүрілуі мүмкін. Бұл жаңалықты естіген Қызылжар халқының салы суға кетіп, сары уайымға салынды. Айтуларынша, әуежайға ұшып-қонатын ұшақтардың қауіпсіздігі үшін осындай шара жасалмақ болған. Бірақ осы жазда аудан әкімі бізге "алаңдамаңыздар, күзге дейін мәселені шешіп береміз" деп уәде еткен еді дейді. Алайда жергілікті билік мыңға жуық тұрғынның баспанасына қатысты мәселесіне мүлдем бас қатырғысы келмейді деп отыр.
Әуежай маңын 100 метр қашықтықта айнала қоршап тұрған 181 үй анықталған. Биыл жазда әкімдік өкілдері келіп баспаналарың сүріледі дегенде естен таңып қала жаздадық дейді халық. Бақандай тоғыз көшенің торабына инфрақұрылымды түгелдей тартып қойып, енді ондағы үйлерді тып-типыл етіп, сүріп тастауы ақылға қонымсыз дейді.
ГҮЛРАЙХАН МАРХАБАЕВА, Тұрғын:
– 11 жыл дегенде өліп-талып, енді міне жасымыз 50-ге тақағанда бала-шағамыз үшін жасаймыз, үйді бітірдік дегенде сносқа кетесің дейді. Мен енді қанша өмір сүремін, қанша жасаймыз білмеймін ғой. Шиеттей бала-шағам бар.
Тұрғындардың айтуынша, сүруге жатады делінген баспаналардың 60-қа жуығының қожайынында құжаты қолында болғанымен, жер-кадастрлық базада жоқ екен. Көпшілікпен кездесуде аудан әкімі құжаттарды реттеп, үйлерді мүлде сүргізбеудің заңды жолын қарастырамыз деп кеткен. Бірақ әлі созбаққа салып жүр дейді жұрт.
БАҚЫТ ЖАҚЫПОВ, Тұрғын:
– Біз сносқа келіспейміз ешқандай. Сносқа болмайтын ақша берейін деп тұр. Өйткені қанша үй салынып қойған бұл жерде. Ол кезге дейін ешқандай ескерту берілмеген. Сетканың жанына жазу да жазып қоймаған. 100 метрге дейін ешқандай там соғуға болмайды деген ешқандай ескерту біз естіген жоқпыз.
Қазір әуежай маңындағы тоғыз көшеде электр бағаналарының басына және бірқатар үйдің шатырына қызыл шамдар орнатып қойған. Күні кеше белгісіз біреулер келіп, бағаналарды жаппай бір метрге қысқартамыз деп белгілеп кетті. Ал одан биік тұрған үй шатырларын уайымдап біз бәйек болып жүрміз дейді жұрт.
СМАЙЫЛ СЕЙТІМОВ, Тұрғын:
– Мына аэропорттың айналасын зерттеп, ар жағындағы кең даланы пайдаланса. Сөйтіп, мына үйлерді сносқа жібергенше аэропорттың ар жағына қарай созатын мүмкіндік бар екен. Соны жасаса.
Ал әкімдіктегілер аталған мәселе азаматтық авиация комитетінде қаралып жатқанын айтады. Онда тұрғындардың талап-тілегі ескерілуі керек. Бірақ әзірге нақты шешім қабылданған жоқ деп отыр.
ӘБІЛҚАЙЫР ОҢҒАР, Шымкент қаласы Абай ауданы әкімдігінің бөлім басшысы:
– Мемлекеттің жерін мұқтаждыққа алу бойынша Шымкент қаласы әкімдігінің немесе Үкіметтің қаулысы шыққан жоқ. Қазір тұрғындарға алаңдауға негіз, себеп жоқ деп түсіндіруге болады.
Әзірге Комитеттің де қашан және қандай кесім айтары белгісіз. Ал шыбын жанын шүберекке түйген 200 жуық үйдің тұрғыны баспанамызды қалай болса да сүргізбейміз деп отыр.






Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
#Шымкент #ШымкентӘуежайы #Наразылықтар

свернуть