خزمەتکارەکان
_________________
کۆیلە و کرێکارە پیرەکانی شەو
ئەوانەی لەبەری ئاوەدانبوونەوەی شارەکان دەخۆن
لەزەت لە زنجیرەکان دەبینن
لەنێوان قامچی و ئازادیدا
قامچی هەڵدەبژێرن
بەرد دەنێنە سەر بەرد
"وەستا"ن لە دروستکردنی قەفەزدا
دیوار "شا" سەنعەتی ئەوانە
وەک چۆن باڵندەکان بەشادی هێلانە دەچنن
بەخۆشییەوە کۆیلەن
بە شادییەوە زیندان بۆخۆیان دروست دەکەن
بەکامەرانییەوە دەبنە عەبد
شەوی درێژ ئاواز بۆ برسێتی دادەنێن
بە سەما تینوێتی لەیاد خۆیان ئەبەنەوە
بە زکر
ملکەچی خۆیان بۆ ئیمپراتۆرە غەمگینەکان
دووبارە ئەکەنەوە
پاسی دەرگای گۆرانیبێژەکان دەکەن
کە لە مەلەکوتەوە چاوەڕێی ئاوازن
عەردی بێ حاصڵ ئاو ئەدەن
گەنمی ڕەش دەهاڕن
صەوڵ لە قەیاغی کۆن دەدەن
شەوی درێژ
ئەوان لە سەرای ئێمەوە
هیوا بەرەو کوچەکان هەڵدەگرن
خزمەتکاری ئومێدەکانی ئێمەن
کۆیلەی ئاواتەکانمانن
بۆ هەرکوێ بچین
ئەوان یاقوتەکانی ئێمە دەخەنە سەر شانی خۆیان
بە دووڕی ئێمە زامی دڵیان دەشارنەوە
بە مەرجانی ئێمە
دیلی خۆیان جوان دەکەن
خزمەتکارەکانمان
ئەوانەی لە جەنگدا لاشەکانمان هەڵدەگرن
بریندارەکانمان تا بەرقاپی حەکیمان دەگوێزنەوە
لەنەفرەتی سپی ئێمە
کە تاعونی سپی دەهێنێت بێدەنگ دەبن
لە ڕۆژی زەمهەریردا
گەرمای دڵی خۆیانمان دەدەنێ
لە ڕۆژی ئاشتیدا
لەزەتی شەڕمان بۆ دەگێڕنەوە
لەشەوی ئازادیدا
دەنگ بۆ خواجاکانمان دەدەن
گوڵاو بۆ وەستاکانمان دەگرن
شەکر دەدەن بە ئەسپی ئاغاکانمان
پڵنگ بۆ کچەکانمان ڕاوئەکەن
سەعات دروستدەکەن بۆ زەمانێک
خاڵی لە ئازادی
شمشێر بۆ شەڕکردن
لەسەر بەروبومی کێڵگە تاریکەکان
کات دەخەنە ژێر چەکوشی بازووە ئاسنینەکانی خۆیانەوە
بەیانیان لە بێژنگی دەدەن
ئاوی ئەبەدیەت هەڵدەگۆزن
ناوی ئاغاکانیان لەسەر "با"ی نەمری دەنووسن
کوتاڵی شەڕ دەچنن ، ئاسمان غەزا دەکەن
بە گوارەی ڕەشەوە
بە بازاڕەکانی شاری مردندا دەڕۆن
گوێ لە وەصفی عەتارەکان دەگرن
باسووقی تاڵانی دەبەخشنەوە
مێووژی سەرکەوتن دەخۆن
ئومێدمان لە دورگە دوورەکانەوە بۆدەهێنن
دەستێک پڕ دەکەن لە خوێنی دوژمنەکانمان و بەدەستێک ئاڵا سپییەکانی ئێمە هەڵدەگرن
شەو لە شەمەندەفەری شەڕدا دەبەنەسەر
لە سەنگەری صوبحدا
قافیەی بەختەوەری
بەحوری کامەرانییە بچوکەکان
عەروزی ئومێد ڕاست دەکەنەوە
خزمەتکارە خنجیلەکانمان
کە بە سینەی پڕ لە تلیاکەوە
به حەشیشی عەشرەتە بەباچووەکانەوە
بە نانی میللەتە بەدبەختەکانەوە دەگەڕێنەوە
کە سەعاتی نیوەشەو لێدەدا
ئامادەن بۆ سپێدەی خوێنین
ئامادەن بە زنیجیرەکانیانەوە عەشق بکەن
ئامادەن لە ئاردی شەو
نانی سپی دروست بکەن
تەنوری وجود دادەخەن
تا شەفەق لەسەر تەپڵە گەورەکان سەما دەکەن
هەلهەلەی شەڕ دەکێشن
دەچنە قوڵایی عەدەم و
لەوێوە مرواریمان بۆدەهێنن
لە جلە دڕاوەکانیاندا
بەسیپاڵی شڕی دیلییەوە
ئاوریشم بۆ ئێمە دەچنن
تاج یاقوتڕێژ دەکەن
ڕۆحی ڕەشی خۆیان
دەخەنە سەر سینەی تەڵا
زیندەگی پیسی خۆیان
دەخەنە سەر قاپی زیو و پێشکەش بە ئێمەی دەکەن
خزمەتکارەکانمان
ئەوانەی خزمەتی تاجەکانمان دەکەن
کلیکێکمان بۆ دەکەن
پاشەڕۆژ دەکاتەوە
هەفتە دوای هەفتە ژیانمان وەک مافور بۆ دەچنن
صوبحمان وەک چەرچەف پیا دەدەن
متیلەی تیشک دەگرنە نوێنی سبەینێمان
بەرگی ئاو دەگرنە سەرینی بەیانیمان
شیری خوداییمان لە فریشتەکان بۆ دەکڕن
قەیماغی پێغەمبەرانمان بۆ دێنن
شەربەتی نەمریمان بۆ زامن دەکەن
"بەختیار عەلی"
