ի՞նչ ունես քո ձեռքում

Ելից 4:2 - «Եւ Եհովան ասեց Մովսեսին . Այդ ի՞նչ է քո ձեռքինը...»:

Ովքեր հանձնել են ամեն բան Աստծո ձեռքերի մեջ, ի վերջո Աստծո ձեռքը կտեսնեն ամեն ինչում։ Անհայտ հեղինակ

Մեր պատկերացումով՝ երբեմն մեծ գործերի և արդյունքների հասնելու համար շատ մեծ ռեսուրսներ են պահանջվում։ Այդպես է, քանի որ մենք մարդ ենք և մարդկորեն մտածելով՝ մեծ խնդիր լուծելու համար մեծ կարողություն է պետք։ Բայց Աստծո մոտ այդ ամենը ճիշտ հակառակն է։ Տերն ասում է՝ մանանեխի հատի չափ հավատք ունեցիր և սարեր կտեղաշարժես։

Կյանքումդ գործած մեղքերի համար պարզապես քեզ պետք է զղջալ, ապաշխարել, և կներվեն բազմաթիվ մեղքերդ: Մեծ հարցերը Աստված կարող է լուծել շատ փոքր գործողությամբ։ Բայց Նրա համար շատ կարևոր է այդ փոքրը, և, հիմնականում, դա մեզ է պատկանում և անհրաժեշտություն կա, որ մենք գործի դնենք այն։

Մովսեսի ձեռքում ընդամենը մի փայտի կտոր էր, որով Աստված ասաց, որ կազատի Իսրայելի ժողովրդին գերությունից։ Եվ այդ փոքր փայտը Տերը կգործածի՝ ցույց տալու իր իշխանությունը և զորությունը, որն էլ կստիպի եգիտացիներին ազատ արձակել հրեաներին։

Աստված Եղիային ուղարկեց մի որբևայրի կնոջ մոտ, և ասաց, որ Ինքը նրան հրամայել է կերակրել Եղիային։ Կինն ընդամենը մի բուռ ալյուր և մի փոքր յուղ ուներ։ Բայց նա համաձայնվեց իր ունեցածով հաց պատրաստել և կերակրել մարգարեին՝ հնազանդվելով Աստծուն։ Այդ ամենից հետո Տերը նրան օրհնեց և մինչև երկրում տիրող սովի ավարտը, այդ կնոջ կարասի ալյուրը և յուղը չպակասեցին։

Տեր Հիսուսին հետևեցին 5000-ից ավել մարդիկ, և երբ Տերը ուզում էր նրանց կերակրել, բավարար կերակուր չկար: Այդ ժամանակ մի փոքր տղա ուներ ընդամենը հինգ հաց և երկու ձուկ, և այն տվեց Քրիստոսին, որպեսզի օրհնի։ Տերն այդ աննշան հացով և ձկով կերակրեց այդ մեծ բազմությանը։

Այսօր նույն հարցը քեզ է ուղղում Աստված։ Իսկ ի՞նչ ունես այսօր դու քո ձեռքում…

Խնդրում եմ՝ մի՛ թերագնահատիր այն, ինչ ունես, հավատք դիր այդ ամենի մեջ և պարզապես հանձնիր քո ձեռքում եղածը, և Աստված այն կարող է զորացնել, օրհնել և բազմացնել։
Երբ հավատքով հանձնում ես Աստծուն քո ունեցած քիչը և սկսում ես գործածել, այն պտղաբեր է դառնում։

Հատկապես ուզում եմ հայաստանցի հային քաջալերել՝ մի՛ նայիր, որ փոքր երկիր ենք, քիչ բնակեցված, չունենք զորավոր միջոցներ և ունենք բազում խնդիրներ։

Եկեք տեսնենք, թե մենք ինչ ունենք, և հենց դա հանձնենք Աստծուն: Նա լավ գիտի, թե ինչպես վարվի մեր ունեցած քչի և փոքրի հետ, որպեսզի մեծ օրհնություն բերի մեր կյանք և մեր երկիր։

Մենք ունենք մարդկային ռեսուրս, հավատք, ունենք Աստծուն նվիրված ազգ, աշխատասիրություն, իմաստություն, ունենք դարերից եկող պատմություն, ունենք հզոր եկեղեցի և իհարկե՝ սփյուռք ու էլի շատ այլ բաներ, որոնք Աստված կարող է հզոր կերպով գործածել հանուն մեր ազգի և երկրի։

Եկեք վստահենք մեր Աստծուն և հանձնենք մեր ունեցածը իրեն և խնդրենք, որ մեզ իմաստություն տա՝ ինչպես գործածենք, որպեսզի Աստծո փառքը երևա մեր մեջ և մեր միջոցով։

Կարևոր չէ, թե ինչ կա ձեռքումդ, այլ ավելի կարևոր է, թե ինչպես ես վարվում դրա հետ. Աստծուն հանձնելը լավագույն միջոցն է այն զորացնելու, օրհնելու և բազմացնելու։

свернуть