
قبل الكلام وقبل تحديد الابعاد
ياجب على غيري وياجب عليه
ما نلتهي عن ذكر من غيب بعاد
وارسل رسوله بالهدي لبريه
اله الثناء والشكر خلاق الاجساد
وله النفوس الشامخات محنيه
من بعدها مال المواقف ترداد
الحي حي وحي راسه وحيه
الرجل لا نبه من القوم رداد
مردد الجدين حقاً مجيه
بجيه لو علمه وراء حد بغداد
وش عاد لو علمه شمال الحويه
نحفظ وفاء الوافي مثل حفظ الاعداد
ومال العذر في سلمنا قابليه
نصبر على الدنيا ولو مرها زاد
ومرار نقضي ذي ومرار ذيه
ويا مل نفسا عافت الملح وزاد
بعد اتصال معرب الجد فيه .
كله حياء لا نقص حقوق الاجواد
ولا المشاعر نحمد الله جليه
جيته من العارض ولا جيت نشاد
محفل خوين عانين له خويه
ميعاد يسوى له ثمانين ميعاد
ميعاد ابن بركي زبون الونيه
وقبل الحروف تهيم من واد في واد
سلامنا مبداه طيب وتحيه
سلام في حفلن معازيبه عماد
عماد بيت العز والمقدريه
بيتا يروده من هل العرف رواد
بيتا خطاطيره على مكرميه
يجود من جده على الغانمه جاد
ويفعل من عزاته دمار المنيه
شرواك يا خالد عمى عين الاضداد
يا ذخر قوماً تكسب الاولويه
روس الرجال مخضبة بيضا حداد
محزم ذوي محمد عمى كل عيه
قومن نباها عطر كمبود وزباد
صف يهول وعزوتن مزحميه
خيالة الحرشا على روس الاشهاد
يوم القويه مالها الا قويه
بوسط الكويت رجال وصروح وامجاد
وفعلاً مخلد وسط نجد العذيه
وفالوادي المشهور حمايت الماد
الوادي اللي حده النافعيه
ولو اسرد التاريخ وش عاد وش عاد
بياض وجهه وهيبتن صيرميه
وبعد لي بعض الادله بالاسناد
دافع غلا ماهي دوافع عطيه
لحقو هل الحرشا على الموت وراد
شطراً لكم يوم السنين الظيه
اهل مهيوبه يوم ردات الاذواد
تطرخ بيارقهم صباح وعشيه
والمذهب اللي زاد من طيبكم زاد
يهنى الدخيل ونوم عينه هنيه
شعبان سنه من على عهد الاجداد
شهرين والايام ثلاث ميه
وسويلم اللي ذاد عن صاحبه ذاد
وشال البنادق واحتمى للبليه
والجبري اللي ماقفه طب وضماد
اظهر بن مجري وجمل ذويه
افعالن تسطر من اسياد لاحفاد
وحنا حفظناها على طيب نيه
الله خلق سبع وبسط سبعاً شداد
وفضل عتيبه بالسطر والحميه
وياجارنا لن راحت علوم وعناد
ابشر بالحارث سريه سريه
وروس الشلاوى ستر غضات الانهاد
عزوة اخو حمده سنع كل هيه
مقبول شيخ القوم كم قاد كم قاد
وكم قال بيتاً ما لقينا حليه
نروي سيوفا باللقاء حدب وحداد
كم واحداً منهن كسنه دميه
واليوم ننعم في ذرى حكم واسياد
والبيرق المشهور فالعاذريه
هذا بلادنا مالنا غيره بلاد
شامخ شموخ طويق ولا طميه
والخاتمه بيتن على خاطري راد
بيتاً فريد ولا سبق قلت زيه
حرام من راس شلوي يا ذو زياد
لحفظ وفاكم دام الاجواد حيه
سيف بن حمد الجعراني الشلوي
