Тарихи құнды жәдігерлер
Шығыс Қазақстанда тарихи-мәдени ескерткіш көп. Еліміздің белгілі археолог ғалымдарының жетекшілігімен жүргізілген археологиялық қазба жұмыстары өз жемісін беруде. Өңірлік коммуникациялар қызметінде өткен кеңесте облыс аумағында 2016 жылдан бері қолға алынған археология саласын дамыту бағдарламасы қорытындыланып, ары қарайғы даму барысы пысықталды.
Бүгінде өткенге көз жүгіртіп, көне заманда өлкемізде ғұмыр кешкен ата-бабалардың өмір тұрмысы мен мәдениеті жіті зерттелу үстінде. 2021 жылы «Елеке сазында» табылған дүниелердің ең құндысы – қағанның алтын тақта отырған суреті бейнеленген алтын бұйым. Бұл б.з.д. 8 ғасырға жатады екен.
Елімізге белгілі археолог, тарихшы ғалымдар Зейнолла Самашев пен Әбдеш Төлеубаев жүргізген қазба жұмыстарының нәтижесінде, ерте қола дәуірі мен сақ кезеңінің құнды жәдігерлері табылуда. Баспасөз мәжілісіне онлайн қосылған археолог Әбдеш Төлеубаев, Шығыс Қазақстаннан табылған бірегей артефактілерді зерттеу негізінде, 3 томдық «Қазақстан тарихы» монографиясын жазып жатқандарын айтады. Алыс және шетел архивтері мен мұражай қорларынан да тың деректер табылған. Жиналған ақпарат көлемі бұл топтамаға сыймайтын көрінеді. Тарихи мұралардың құндылығы мен күллі түркі мәдениетіне қосатын сүбелі үлесі туралы Назарбаев университетінің түркология кафедрасының оқытушысы Айдын Жүнісханов баяндады. Өңірде жүргізілген археологиялық қазба жұмыстарының нәтижесінде, облыстық тарихи-өлкетану музей қоры бірегей, құнды жәдігерлермен толығуда.
Қазіргі уақытта студенттер де қазба жұмыстарының барысын өз көздерімен көріп, тарихпен жете танысу мүмкіндігіне ие. Сондай-ақ, шетелде ұйымдастырылған «Ұлы дала алтыны» көрмесінен кейін сақтар салтанат құрған өлкеге деген әлем жұртшылығының қызығушылығы артуда. Алдағы уақытта «Ақбауырдағы» ежелгі сақ қоныстары, «Елеке сазы»-ның патша қорғандарын зерттеу мен Қалба жоталары, Ақ қайнардағы археологиялық қазба жұмыстары одан әрі жалғасады.

свернуть