Anëtarët e Komisionit Qendror të Zgjedhjeve kanë refuzuar kërkesën e Partisë Demokratike dhe Lëvizjes Socialiste për Integrim për të patur komisionerë në zgjedhjet e 30 qershorit, me argumentin se partitë nuk janë subjekt zgjedhor, dhe janë larguar nga Parlamenti.
Përfaqësuesi ligjor i PD-së, Ivi Kaso tha se anëtarët e KQZ janë kërcënuar nga mazhoranca për të mos pranuar komisionerë, ndërkohë ishte vetë ai që e ktheu në kërcënim ndaj anëtarëve duke i përmendur burgun në rast se nuk votojnë. .
PD dhe LSI, edhe pse jo parti parlamentare, kërkuan të shfrytëzonin atë që e quajtën si të drejtë ligjore nisur nga rezultati i zgjedhjeve të 2017-ës. për të pasur komisionerë në zgjedhjet e 30 qershorit, edhe pse ato i kanë bojkotuar zgjedhjet dhe nuk kanë asnjë kandidat për kryetar bashkie.
Bledar Skënderi, anëtari i KQZ-së deklaroi votën kundër duke argumentuar se “Nuk kanë të drejtë ligjore për të çuar komisionerë”.
Edhe anëtarja Rezarta Bitri deklaroi votën kundër duke thënë se “Është kusht që partitë të jenë subjekt zgjedhor për të pasur komisionerë”.
Po njëlloj votoi edhe anëtarja Edlira Jorgaqi duke u shprehur se “Interesi duhet të jetë i drejtpërdrejtë me subjektin politikë”.
Gjithashtu edhe anëtari Denar Biba e ka shprehur qëndrimin e tij kundër kërkesës së opozitës për të patur komisionerë nëpër KZAZ.
Përfaqësuesi ligjor i Partisë Demokratike, Ivi Kaso, tha se është e drejtë ligjore për të pasur komisionerë. Ai tha në mbledhjen e KQZ, se në procesin e deritanishëm ka shkelje të mëdha ligjore që sipas tyre lidhen me regjistrimin e kandidatëve të tjerë, siç janë të Bindjes Demokratike të Astrit Patozit, që sipas Kasos, por tentohet të krijohet një opozitë fasadë.
Kjo mbledhje ka patur ngjallur mjaft debate mes përfaqësuesit ligjor të PD-së, Ilvi Kaso dhe anëtarëve të KQZ të cilët janë përfaqësues të mazhorancës.
