«Болашақ» бағдарламасымен білім алған жастар қызметін ауыл-аймақтан бастауы тиіс. Бұл мәселе «Мемлекеттік қызмет туралы» Заң жобасында қаралып жатыр.

Ал мұндай тәжірибеден өтпеген жастардың кәсіби деңгейде өсуі екіталай. Бұл туралы бүгін «Болашақ» қауымдастығы кеңесінің төрағасы Бауыржан Байбек мәлімдеді. Өйткені, мемлекет қаржысынан шетелде білім алу үшін әрбір жасқа жылына 5 миллион теңге бөлінген. 19 жылдың ішінде 8 мың қазақстандық әлемдегі беделді оқу орындарынан білім алып келді.

Бауыржан БАЙБЕК, «Болашақ» қауымдастығы кеңесінің төрағасы:

- «Мемлекеттік қызмет туралы» Заң жобасы бойынша «Болашақты» бітіріп келген түлектер мемлекеттік қызметте жұмыс жасаймын десе, алдымен ауыл-аймақтарда жұмыс жасауы керек. Сол жергілікті өңірдің, халықтың тыныс-тіршілігімен танысу қажет. Әсіресе, шетелде оқыған азаматтар аймақтардағы мәселелерді көп біле бермейді. Қазақ тілін кім білмейді, солар үйренеді. Сонда ғана заманына сай, білімі жоғары болады.

Осы мақсатта Астана мен Алматыда «Болашақ» түлектерінің V форумы өтіп жатыр. Дәстүрлі форумға мемлекеттік орган, ұлттық және жеке компаниялардың өкілдері қатысуда.

Назира МОЛДАҒҰЛОВА, форумға қатысушы:

- «Болашақ» бағдарламасын бітірген 5 баладан түйіндеме түсті. Соның ішінде экология биотехнологиясы, молекулалық биотехнология салаларына байланысты. Олар тәжірибеден өтпейді. Біз қойған мақсатпен жұмысқа бірден қабылданады.

свернуть