Bakı Mühəndislik Universitetində “MƏNİM UNİVERSİTETİM ” adı altında bilik və yaradıcılıq günü keçirilib. Əsasən abituriyentlər və onların valideynləri üçün nəzərdə tutulan tədbirdə Bakı, Sumqayıt şəhərləri və Abşeron rayonundan 100-lərlə valideyn və şagirdlər iştirak edib.
Tədbirdə iştirak edən universitetin rektoru professor Havar Məmmədov, prorektorlar və professor-müəllim heyəti stendləri gəzərək tələbələrin hazırladıqları elmi-şoularla yaxından tanış olublar.
Universitetin şəhərciyində təşkil olunan tədbirdə universitetdə fəaliyyət göstərən 30-dan çox elmi və sosial tələbə dərnəkləri abituriyentlərin universitet və tələbə həyatı barədə məlumantlandırılması üçün xüsusi proqramlar hazırlayıblar. Onların elmi şouları və ifalarında mədəniyyət nümunələri tədbirə xüsusi rəng qatıb. Tədbirə gələn qonaqlar və eləcə də abituriyentlər Bakı Mühəndislik Universitetinin maddi-texniki bazası, texnoparkı ilə yaxından tanış olub, onları düşündürən suallar universitetin müəllimləri və tələbələri tərəfindən cavablandırıb.
Qeyd edək ki, tədbirin təşkilində məqsəd abituriyentlərə ixtisas seçimində kömək etmək və ixtisas seçimi istiqamətində maarifləndirilməsinə çalışmaqdır.
