Բուն Բարեկենդանից հետո մեզանում սկսվում է Մեծ Պահքը, որը տևում է 48 օր և ավարտվում է Զատկի տոնի նախօրեին։
Պահքի ընթացքում հրաժարվում են ոչ միայն որոշակի կերակուրներից, այլև մոլի սովորություններից, շատախոսությունից, ստախոսությունից, հայհոյանքից և այլ մեղքերից:
Պահքի 40 օրը խորհրդանշում է անապատում Քրիստոսի քառասնօրյա աղոթքի, ծոմապահության և ապաշխարության շրջանը: Իր մկրտությունից հետո Հիսուս «հոգով անապատ առաջնորդվեց ու քառասուն օր փորձվեց սատանայից: Չկերավ ու չխմեց այն օրերին»։
Նույն ձևով պահքի շրջանում հորդոր է արվում հրաժարվել որկրամոլությունից և օգտագործել բացառապես բուսական ծագում ունեցող սննդամթերք: Կերակրից հրաժարվելն առանց մեղքից հետ կանգնելու` անօգուտ է: «Սատանան միշտ պահքի մեջ է, ոչինչ չի ուտում, բայց մեղք գործելուց չի դադարում և չի հոգնում», - ասել է Ս. Գրիգոր Տաթևացին:
Մեզ հետ զրույցում Ս. Սարգիս Առաջնորդանիստ եկեղեցու հոգևոր սպասավոր Տեր Եսայի քահանա Արթենյանը խոսեց Մեծ Պահքի խորհրդի, նշանակության մասին։
