Şəhid Orxan Elxan oğlu Dadaşlı 1997-ci ildə Lənkəran rayonunun Darquba kəndində anadan olub. 2013-cü ildə Lənkəran şəhər 8 saylı tam orta məktəbin 11-ci sinifini bitirən Orxan Dadaşlı 2014-cü ildə həqiqi hərbi xidmətə çağırılıb. Gədəbəy rayonunda yerləşən "N" saylı hərbi hissəyə göndərilən Orxan Dadaşlı . xidməti dövründə atıcı-snayper kimi xidmət keçib. 2015-ci ildə xidmətini başa vurduqdan sonra o, bir müddət avtomobil ustası işləməyə başlayıb. Sentyabrın 27-sində başlanan və 44 gün davam edən II Qarabağ müharibəsində iştirak etmək üçün könüllü olaraq Lənkəran rayon Hərbi komissarlığından qeydiyyatdan keçərək döyüşə yollanan Orxanın döyüş yolu Füzulidən başlayıb.
Döyüşlərin birində mərmi yarası alan #OrxanDadaşlı# hospitala yerləşdirilib. 9 gün hospitada müalicə aldıqdan sonra yarasının ağır olmasına baxmayaraq yenidən cəbhəyə döyüş yoldaşlarının yanına qayıdır və noyabr 7-inə kimi Şuşa istiqamətində döyüşür.
Füzuli, Cəbrayıl, Zəngilan, Qubadlı və Şuşanın alınmasında fəal iştirak edən Orxan noyabr ayının 7-də Şuşa uğrunda gedən ağır döyüşlərdə qəhrəmancasına həlak olub. O, ölümündən sonra Ali Baş Komandanın sərəncamı ilə "Vətən Uğrunda" , "Cəbrayılın və Qubadlının azad olunmasına görə” medalları ilə təltif olunub.
