Түркістан облысы Түлкібас ауданындағы мектептер күзетсіз қалуы мүмкін. Себебі, қарауылдар жекеменшік мамандандырылған күзет агенттігімен жұмыс істеуден бас тартқан. Айтуларынша, білім ошағының қауіпсіздігін қамтамасыз ететін мердігер компания келе сала жұмысшылардың жалақысын қысқартып, еңбек демалысы, медициналық сақтандыру сияқты әлеуметтік төлемдерді алып тастайтындарын ескертіпті. Ал, бұл талапқа көнбегендерді жұмыстан жаппай қуып жатыр деп ашулы.
Биыл жазда Оқу-ағарту министрлігінің бұйрығымен бала саны 300-ден асатын мектептердің қауіпсіздігі мамандандырылған агенттіктердің құзыретіне берілген. Бұл құжат 1-ші қазанда күшіне енді. Осы орайда, Түлкібас ауданында да білім ошақтарын бақылайтын мердігер анықталыпты. Бірақ жеке компания жұмысын бастамай жатып жалақыны қысқартамыз, әлеуметтік төлемдерді алып тастаймыз деп ескертті дейді жиналғандар. Бұл талап онсызда айлығын шайлығына жеткізе алмай жүрген күзетшілердің наразылығын туғызды.
ҚАСЫМЖАН АНАРОВ, күзетші:
– Біз жекеге өтпейміз, өкіметтің балансында қаламыз. Өйткені әрқайсымызда 5-6 баладан бар. Ол 62 мың кімге жететінін білмейміз. Баға өсіп жатыр.
Мектептің қарамағында қалуды қалаған қарауылдар бұл уәжін күзет агенттігінің өкілдеріне де айтыпты. Бірақ олар жаңа ережеге көнбесең арыз жаз деп, 6 жұмысшыны қызметінен қуып үлгерді дейді.
МАРЛЕН НҰРМАМБЕТОВ:
– Мен жұмыстан шыққан жоқпын, мен әлі өз қолыммен арыз жазған жоқпын. Бізді автоматически жұмыстан шығартып отыр. Ал бұл фирма әлі жұмысқа неғыған жоқ.
Ал мердігер компанияның өкілдері әр мектепке бөлінген қаражат мардымсыз, амалдың жоқтығынан жаңа талап енгіздік деп түсіндіреді.
БОЛЫСБЕК ҚАРАҚҰЛОВ, Күзет агенттігі басшысының орынбасары:
– Әрбір мектепке бөлінген 308 мың боп жатыр. Оның ішінде 12 пайызы НДС дейміз. Жалақы осыған байланысты мен есептеп неғып көрсем, 70 700 теңге бір күзетшіге бөлініп отыр. Оның ішінде қолма-қол алатынын 62 077 теңге болып отыр.
Тендерді ұтқан компания ережесін өзгертпей, жалақыны да көтермейтін болды. Ал, аудан әкімдігінің өкілдері қолдан келер басқа шара жоқ деп отыр.
ЕРЖАН ҚАДЫРБЕК, Түлкібас ауданы білім бөлімінің басшысы:
– Өтемақыларды төлеп береміз. Әрі қарай осы Іскер мердігер мекемесімен еңбек шартын жасасып, ол кісілер осы мамандандырылған күзет мекемесінде жұмыс атқаратын болады.
Дегенмен, мектеп қарауылдары мамандандырылған күзет қызметінен бас тартуды сұрап, үкіметке хат жазбақшы. Мардымсыз жалақыға күн көру қиын деген күзетшілер мәселеміз шешілмесе жаппай жұмыстан кетуге мәжбүрміз деп тарқасты.
Бізді әлеуметтік желіде оқыңыздар:
Информбюро 31 [ Ссылка ]
Informburo kz [ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
