Заменик министерот за образование и наука, Спиро Ристовски, во друштво со својот домаќин, градоначалникот на Општина Илинден, Жика Стојановски, го посетија основното училиште „Браќа Миладиновци,“ во населено место Миладиновци, каде што се во тек градежни активности.
Заменик министерот Ристовски и градоначалникот Стојановски на самото место се запознаа како течат работите околу целосната промена на покривната конструкција на ова училиште, со површина од 1.400 метри квадратни. Притоа, заменик министерот Ристовски ја истакна одличната соработка што Министерството ја има со Општина Илинден во насока на подобрување на условите за образование.
-Во летниот период планирано е да се промени покривот со што ќе се заокружи целиот процес на реконструкција на училиштето. Со поддршка на Владата и на Општината досега се изврши реконструкција во внатрешниот дел, промена на прозорци и санитарии. Со Општина Илинден нинвестиравме 11 милиони денари, изјави Ристовски.
Градоначалникот Стојановски истакна дека во рамките на реализацијата на проектот за реконструкција на основните училишта, Општина Илинден интензивно работи на обезбедување на квалитетни услови за следење на образовниот процес на над 2.000 ученици колку што учат во трите централни и петте подрачни основни училишта.
Во основното училиште „Браќа Миладиновци” неодамна беа изградени две нови училници и помошни простории, со вкупна површина од 200 метри квадратни. Во подрачното училиште во Текија во тек е доградба на уште една училница, наставничка канцеларија, помошни простории и тоалети на површина од 100 метри квадратни.
Во подрачното основно училиште „Ристо Крле“ во Мралино поставен е нов покрив, рехабилитирана е фасадата на училишната зграда, поставена е настрешница и е уреден влезот пред училишната зграда, а за новата учебна година интензивно се работи и во ОУ „Гоце Делчев“.
Во Средното општинско стручно училиште „Илинден“ обезбедена е комплетна лабораторија со нова модерна и современа техничка опрема за вршење на практична настава, како и нови гардеробери за сите ученици.
-Со заеднички инвестиции можеме многу да придонесеме во подобрувањето на условите во образованиоето и со тоа да ги креваме стандардите во образованието, додаде градоначалникот Жика Стојановски.
