Əfsanəvi futbolçu Messi və komanda yoldaşları Bakıda azarkeşlərlə görüşüb - XƏBƏR 4 TV
Futbol əfsanəsi Lionel Messi və dünya ulduzları Luis Suarez, Serxio Buskets və Xordi Alba Bakı Kristal Zalında fanatlarına unudulmaz anlar yaşadıb.
Xəbər4 TV xəbər verir ki, pərəstişkarların dünya futbolunun ulduzları ilə görüşündən əvvəl səhnədə “Natiq” ritm qrupunun çıxışı olub. Daha sonra dünyaşöhrətli bəstəkar və müğənni Villi Uilyam konsert proqramını təqdim edib.
Dünya çempionu, 8 dəfə “Qızıl top” mükafatına layiq görülən Lionel Messinin futbol karyerasını əks etdirən filmin nümayişindən sonra isə Messi, Suarez, Buskets və Alba səhnəyə çıxıb.
Ölkəmizin uşaq futbol komandalarının təmsilçilərinə bir çox gəncin arzuladığı imkan da yaradılıb. Belə ki, gənc futbolçularımız dünyanın ən yaxşı futbolçusu Lionel Messi və komanda yoldaşlarına top ötürərək özlərini peşəkarlarla bir oyunun iştirakçıları kimi hiss ediblər. Daha sonra futbol ulduzları gənc həmkarları və sağlamlıq imkanları məhdud uşaqlarla xatirə şəkli çəkdirib.
Ulduz futbolçuların imzalı topları auditoriyaya dağıtması anları isə coşqu ilə qarşılanıb. Futbol həvəskarları üçün bu idman bayramı məşhur “Morandi” qrupunun çıxışı ilə davam edib. Minlərlə fanatın qatıldığı tədbirdə Bakının uşaq evlərinin sakinləri, sağlamlıq imkanları məhdud uşaqlar və şəhidlərimizin övladları da dəvət olunub.
Tədbirə bilet satışından əldə olunan vəsait isə xeyriyyə məqsədilə istifadə olunacaq.
Əfsanəvi futbolçu Messi və komanda yoldaşları Bakıda azarkeşlərlə görüşüb - XƏBƏR 4 TV
#leomessi #crystalhall #luissuarez #sergiobusquets #jordialba #football #futbol #messi #willywilliam #konsert #görüş #azarkeş #morandi #baku
