أنا أشهد إن الشوق جلاّد ^^^ وإن تبعت المقفي .. مذله

وإنّ المحبة صبر وجهاد ^^^ و إمفارق الغاليين علّه

وإن ضحكة السالي بالأعياد ^^^ ماهي بدمعات الموّله

وا عزتي لي من التوجّاد ^^^ والعين من دمعٍ .. اتهله

صد وهجرني ولد الاجواد ^^^ من دون لا سبه و زلّه

أســـــقاني من الصد برّاد ^^^ واســــقيته من الوّد دلّه

جيت لمحله دون ميعاد ^^^ ولا لقيتـــــــــه في محلّه

ما كن غير بلاده بلاد ^^^ ولا ســـــــــوى حلته حلّه

عيون حرٍ لا طلع صاد ^^^ عين اتشـــــوفه .. ما تملّه

والوجه نور الفجر لا انقاد ^^^ والليـــــل مجدول يهلّه

وامبيسمه كالجمـــــر وقاد ^^^ والرمــش للخدين .. ظله

والمسك والريحان والكاد ^^^ ريحة نفْســـــهْ .. المستفلّه

سلطان خلّه راح ماعـــاد ^^^ واظن خلي مثــــــــل خلّه

دامه تنـــاسى الملح والزاد ^^^ انا نســــــيت الحب كلّه

إلا الســـــــــلام يرد ويعاد ^^^ و إلاّ الموّده .. مضمحلّه


للشاعر القطري :

علي الغياثين

свернуть