Енді ауруханаларға жедел жәрдеммен келген науқастар дәрігерді күтіп уақыт жоғалтпайды. Қабылдау бөлімінен ашылатын арнайы бөлме ауруларға күндіз-түні қызмет жасайтын болады. Бұл әсіресе халі нашарлап келген науқастарға дер кезінде жәрдем беруге таптырмас әдіс. Бұл туралы бүгін ҚР жедел медициналық көмек ассоциясымен бірге өткен жиында талқыға салынды.
Алғаш рет өткізіліп отырған көшпелі жиынға өзге облыстың жедел жәрдем станцияларының бас дәрігерлерімен қатар Ресей елінің жедел жәрдем қауымдастығының өкілдері де келді. Олар саладағы қызметті жақсарту мен жаңа форма және технологияны енгізу үшін екі жақты мемарандумға қол қойды.
Жедел жәрдемнің өзекті мәселелерінің бірі көлік кептелісі. Онсыз да науқасқа асығып бара жатқан бригадаларға машиналардың жол бермейтіні тағы бар. Осындай төмен мәдениетті қолдан жасағандарды енді жол сақшылары қадағалайды. Тіпті айыппұл салуы да мүмкін. Тағы бір жаңашылдық, ауруханаға жеделдетіп жеткен науқастарға арнайы дәрігерлер көмек береді.
Жедел жәрдем қызметін жақсарту бойынша жоғары деңгейде өткен бұндай жиын бірінші рет ұйымдастырылып отыр. Өйткені Республикалық жедел медициналық көмек қауымдастығы биыл құрылған. Басты мақсат ауру науқасқа жағдай жасау.
Нұржан ОТАРБАЕВ, Республикалық жедел медициналық көмек қауымдастығының басшысы:
- Бірінші кезекте, мамандардың тәжирбесі жоғары болуы керек. Шетелдік талаптарға сай жасау жолын қазір үйретіп жатырмыз. Бұл жағынан жұмыстар жемісті. Жұмысқа деген жауапкершілікті көтеру міндеттеліп отыр. Сонымен қатар олар өз құқықтарын да қорғай білуі керек.
Бүгінде Тәулігіне 1500-нан аса қабылдау алатын қалалық жедел жәрдем станциясында қазір 79 бригада қызмет жасайды. Алайда күндіз-түні көмекке аттанатын көліктердің бүгінде тозығы жеткен. Осыған орай жуырда 30 қызметтік көлік станцияға берілмек. Қазір медициналық құралдар жабдықталып жатыр.
Гүлзира БАЙДУЛЛАЕВА
