Ամեն տարի ողջ աշխարհում քաղցկեղով հիվանդների թիվը աճում է 2-4%-ով: Հայաստանն այս առումով աշխարհից հետ չի մնում: Այս մասին այսօր լրագրողներին ասաց Ուռուցքաբանության ազգային կենտրոնի տնօրենի տեղակալ Գագիկ Բազիկյանը: «Եթե 90-ական թվականների սկզբին մեր հանրապետությունում 3500-4000 մարդ էր հիվանդ այդ ախտորոշմամբ, այսօր արդեն` մոտ 8000 մարդ»,- ասաց Գագիկ Բազիկյանը:
Իսկ 10 տարվա ընթացքում քաղցկեղով հիվանդների թիվն աճել է 36 տոկոսով: Ուռուցքաբանության ազգային կենտրոնի փոխտնօրենն ասում է` քաղցկեղը մահապատիժ չէ, այն միայն աղտորոշում է, որը հնարավոր է բուժել վաղ հայտնաբերման դեպքում: «Այսօր Հայաստանում ավելի քան 15 000 մարդ է ապրում, ովքեր բուժվել են քաղցկեղից 5 -ից ավելի տարիներ առաջ: Սա մեր փոքր պետության համար բավականին մեծ թիվ է»,- ասաց Գագիկ Բազիկյանը: Խնդիրն, ըստ բժշկի այն, որ, այն մարդիկ, ովքեր բուժվել են այս հիվանդությունից, նույնիսկ չեն իմացել, որ հիվանդ են` հարազատները նրանց չեն ասել:
«Եվ այն 15 000 մարդիկ, ովքեր ապրում են, կարծում են, թե իրենք քաղցկեղ չեն ունեցել: Իսկ որևէ մեկի մահվան դեպքում բոլորն իմանում են: Արդյունքում ստեղծվում է այնպիսի տպավորություն, թե քաղցկեղով բոլոր հիվանդները մահանում են»,- ասաց Ուռուցքաբանության կենտրոնի փոխտնօրենը:
Հայ-ամերիկյան առողջության կենտրոնի ներկայացուցիչ Անի Հակոբյանի հավաստմամբ` նախաքաղցկեղային փուլում հիվանդությունը հայտնաբերելու և ճիշտ բուժում անցկացնելու դեպքում 98% հավանականություն կա, որ հիվանդը կապրի: «Իհարկե կան ագրեսիվ դեպքեր, որոնք, ցավեք, բժշկությունը դեռ չի կարողանում հաղթահարել, բայց այդ 98%-ը հսկայական թիվ է»,- ասաց Անի Հակոբյանը:
Ինչպես նշեց Ուռուցքաբանության ազգային կենտրոնի փոխտնօրեն Գագիկ Բազիկյանը` քաղցկեղով հիվանդ սոցիալապես անապահով մարդկանց բուժումն իրականացվում է անվճար: Հետվիրահատական բուժումը` ճառագայթումն ու քիմիոթերապիան, այս խմբի մարդկանց համար նույնպես անվճար է:
«Իսկ եթե հիվանդը անապահով խավի մեջ չի մտնում, եթե դեղորայքի գինը անցնում է 30 000 դրամից, հիվանդը մասնակցում է դեղորայքի գնմանը»,- ասաց Բազիկյանը:
