Қаланың бірнеше ауданында тұрғындар жауын суынан аттап баса алмай қалды. Соңғы екі күнде Алатау ауданында арық сулары арнасынан асып, оннан астам үй мен қора-қопсыны су басты. Оқыс оқиға орын алған сәттен бастап Төтенше жағдайлар департаменті мен жергілікті әкімдік мамандары көмекке келген. Қазір ондағы жағдай түзеліп, аулалар тазартылыпты. Десе де алатаулықтардың бас ауыртар мәселесі бұнымен бітпейді. Өйткені ауданда арық жүйесі жоқ. Сондықтан жаңбыр жауған сайын, жағдай қайталанады.
