Алматыда сот шешімімен келіспей, үйін босатудан бас тартып бес адамға бірдей оқ жаудырған Игорь Дужновтың бұл қылмысқа баруына не итермелегенін әйелі де, достары да түсінбей отыр. Ал кісі қолынан қайтыс болған учаскелік полиция инспекторы майор Дархан Сүлеев пен капитан Нұрбол Байғазиев табельдік қарулары бола тұра өздерін қорғамаған. Досымен бірге көз жұмған үйдің жаңа иесі кім? Өмір Серікбекұлы толығырақ тарқатсын.
Оқиға орнында тіл тартпай кеткен жеке сот орындаушы Мұрат Әбенов заң бойынша міндетін атқарған еді дейді әріптесі. Адвокат Олег Чернов марқұммен 6 жыл бұрын танысып, бірге жұмыс істеп келгенін айтады. Осы уақыт ішінде борышкерлермен сөзге келмепті. Кешегі оқиғаны естігенде төбемнен тас түскендей болды дейді.
ОЛЕГ ЧЕРНОВ, Адвокат:
– Оқиға орнында Мұрат Әбеновтан басқа да сот орындаушысы болуы мүмкін еді. Күдіктіні ондай әрекетке итермелеген ол жердегі қызметкерлер емес. Ұзақ жылдар бойы созылып келе жатқан сот процесі деп ойлаймын.
Ал, сот шешімімен борышкерді үйден шығару кезінде көз жұмған полицейлерде табельдік қару болған. Бірақ, тәртіп сақшылары күдікті қару кезенгенде өздерін неліктен қорғай алмағаны белгісіз. Алматы қаласы полиция департаментінің басшысы үйде кішкентай балалар болғандықтан қару қолданбаулары мүмкін деген болжам айтты. Нақтысы ведомствоаралық комиссияның тексеруінен кейін белгілі болмақ екен.
ҚАНАТ ТАЙМЕРДЕНОВ, Алматы қаласы ПД басшысы:
– Бірінші Сүлеев Дархан біздің департаментте 2004-ші жылдан бері жұмыс істейді. Қазір қайтыс болған Сүлеевте бес баласы қалды. Екінші Бағазиев 2014-ші жылдан бері жұмыс істейді. Екеуі де осы Ақбұлақ микрорайонының учаскелері.
Кісі қолынан көз жұмған полицейлердің отбасына баспана берілетін болды. Ал, күдікті тұрған 200 шаршы метр үйді нарықтағы бағасынан екі есе төменге сатып алған Нұрахмет Тұрғанов осындай кепілде тұрған үйлерді сатып алу, қайта сатумен айналысыпты. Орда.кз порталының мәліметінше, бұл оның негізгі табысы болған екен. Алайда, осы жолғы саудасы сәтсіз аяқталып, қасындағы танысымен бірге кісі қолынан қаза тапты.
ДІНМҰХАМЕТ ОМАРОВ, Куәгер:
– Бірінші 3 дауыс шықты мылтықтың. Мылтықтың дауысы деп ойлаған жоқпыз тапа-тал түсте ғой. Сосын 3 дауыстан кейін тағы 4 выстрел естілді примерно.
Есік алдында бес адамға оқ жаудырған 54 жастағы Игорь Дужнов жеке кәсіпкер болған. Көлік дөңгелегі мен автобөлшектер сатумен айналысқан. Бизнесмен ретінде өте белсенді еді дейді әріптесі. Тіпті бірнеше қайырымдылық шараларына қатысып, жақсылық жасауға септескен екен.
МАКСИМ ВДОВЦЕВ, Кәсіпкер:
– Мен Игорьды ақтамаймын. Қолымен жасағанды мойнымен көтеру керек. Бірақ, банктен қомақты қаржыны кредитке алып, кейін оны төлей алмаған адамдар мәселені түрлі жолмен шешеді. Кейбірі өзіне қол жұмсаса, енді бірі барлық мүлкін сатып құтылады. Игорь осындай қадамға барды. Дұрыс емес әрине.
Қазір күдікті қамауға алынған. Сотқа дейінгі тергеп-тексеру жұмыстары жүріп жатыр. Екі қылмыстық іс қозғалып, Игорь Дужновтың мылтығы тәркіленген.
Өмір Серікбекұлы, Сергей Шуйский
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#қанды_оқиға #атыс #Алматы #Ақбұлақтағы_атыс
