Араб инвесторлары Ақтауда 35 қабатты тұрғын үй салып, теңіз жағасындағы үңгірлерді абаттандырмақ.
Шейх Сурур бин Мұхаммед әл-Нахайян бастаған іскерлер тобы аймақ басшысымен кездесіп, туризмді дамытуға бағытталған бірқатар жобаны таныстырды.
Біріккен Араб Әмірлігінен келген инвесторлар қаланы көркейту жұмыстарына қаржы құюға әзір. Нақтырақ айтқанда, 35 қабатты тұрғын үй кешені, зәулім сарай мен сәулетті мейрамхана тұрғызбақ. Сондай-ақ жағалаудағы үңгірлерді ретке келтіріп, туристер тамашалайтын орынға айналдыруды көздейді. Кездесу барысында қос тарап Маңғыстауда екі ел кәсіпкерлерінің қатысуымен экономикалық форум ұйымдастырып, түйелер жарысын өткізуге уағдаласты.
Мұхаммед Бахуш, компания өкілі (БАӘ)
– Аталған жобалар қолдау тапса, келер жылы құрылыс жұмыстарын бастаймыз. Туристерді Маңғыстау облысына тарту үшін барлық жағдайды жасаудың жолын қарастырамыз. Алдағы уақытта екі ел арасында табысты ынтымақтастық қатынас нығая түседі деп үміттенемін.
