Newarmenia-ի տաղավարում զրուցել ենք «Հանուն Հադրութի» հասարակական կազմակերպության նախագահ Լևոն Հայրյանի հետ։
44-օրյա պատերազմի հետևանքով Արցախից տեղահանված բնակչության թիվը մոտ 35 հազար է, նրանցից մոտ 21,5 հազարը տեղափոխվել են Հայաստանլ, մնացածը՝ Արցախում են։ Դրանց թվում են 13,5 հազար մարդ, որոնք տեղահանվել են Հադրութի շրջանից։ Արցախցիները բազմիցս դիմել են Հայաստանի կառավարությանը՝ իրենց միջազգային փախստականի կարգավիճակ տալու հարցով, բայց պետական մարմիններից նրանց հստակ պատասխան չեն տալիս։ Լևոն Հայրյանը հարցադրում է անում․ «Եթե միջազգային փախստականի կարգավիճակ չունենանք, ինչպե՞ս ենք վերադառնալու Հադրութ ու Շուշի»։
«Նոյեմբերի 9-ի փաստաթղթում ասվում է, որ փախստականներն ու տեղահանվածները պետք է վերադառնան իրենց հայրենիք։ Մենք չունենք այդ կարգավիճակը, եթե վաղն իրոք այս քննարկվող խաղաղության պայմանագիրը ստորագրեն, Ալիևն ասի՝ այս մարդիկ հադրութեցի չեն, շուշեցի չեն, քաշաթաղցի չեն, չունենք կարգավիճակ, ո՞նց պիտի վերադառնանք մեր տարածքներ։ Կարգավիճակ ստանալու կարևոր նպատակը դա է, որպեսզի հնարավորություն ունենանք վերադառնալ մեր բնակավայրեր»,- ասում է Լևոն Հայրյանը։
Արցախցիները հումանիտար ապաստանի հարցով դիմել են Ֆրանսիայի դեսպանատուն, Լևոն Հայրյանը մանրամասնում է իրենց քայլերի նպատակը։ Ըստ նրա՝ կարևոր է, որ համայնքը միասնական մեկ վայրում բնակվի։ Հայաստանի կառավարությունը պետք է տարածք հատկացնի համայնքի համար, քանի որ համայնքը միասնական պետք է ապրի, ինչը կարևոր է սովորույթները պահպանելու և միասնական լինելու համար։ «Մենք այդ նպատակով ենք դիմել դեսպանատներ՝ ապաստանի հարցով, որ մեզ տեղ հատկացնեն՝ համայնքով ապրելու համար։ Հայաստանից իշխանություններին էլ ենք նույն պահանջը ներկայացնում, քանի որ մենք համայնքն արդեն կորցնում ենք»,- նշում է նա։
Անդրադառնալով Արցախ վերադառնալու հնարավորություններին՝ Հայրյանը նշում է․ «Մեզ ասում են՝ վերադարձեք Արցախ, բայց Արցախին կարգավիճակ չեն տալիս։ Մենք բազմիցս ասել ենք՝ եթե Արցախին անկախ կարգավիճակ չտան կամ Հայաստանի կազմում, Ղարաբաղում հայ չի մնալու»։
Ավելին մանրամասն՝ տեսանյութում
00:00 Սկիզբ
00:25 Ի՞նչ խնդիրներ ունեն տեղահանված արցախցիները
04:51 Արցախցիների սոցիալական հատկացումները կրճատել ու ուշացնում են
06:08 Ի՞նչ խնդիրներ է լուծելու փախստականի կարգավիճակ ունենալը
11:08 Արցախցիները հումանիտար ապաստանի հարցով դիմել են դեսպանատներին, ինչո՞ւ
13:15 Հայաստանի կառավարությունը պետք է տարածք հատկացնի տեղահանված համայնքի համար
14:39 Արցախցիները ՄԱԿ-ից իրենց հարցերի քաղաքական լուծում են ակնկալում
16:44 Պատերազմի հետևանքով Արցախից տեղահանվել է մոտ 35 հազար մարդ
17:45 Առանց Արցախի կարգավիճակի հստակեցման, վերադարձի մասին խոսելը հակահայ քաղաքականություն է
22:53 Արցախցիների շրջանում արտագաղթ կա՞
24:09 Հայերը պետք է զինվեն ու մաքսիմալ չեզոքություն պահպանեն այսօր
