Ел азаматтарының зейнетақы активтері биыл қай салаға жұмсалатыны белгілі болды. Қаражат бес саланы дамытуға бағытталады. Бұл туралы Ұлттық банк өткізген баспасөз жиынында айтылды.
Қазақстандықтардың зейнетақы жиынтығы ақпан айының қорытындысы бойынша, 6 трлн 700 млрд теңгеге жеткен. Оның 28,5 млрд-ы – соңғы екі айдың жиынтығы. Бұл туралы Ұлттық банк басшылығы мәлімдеді.
Қомақты қаржы мемлекеттік құнды қағаздарды және ұлттық валютадағы активтерді сатып алуға жұмсалады. Сонымен қатар Халықаралық қаржы ұйымдарының теңгемен шығаратын облигациялары сатып алынады. Оған қоса Қазақстандық қаржы қорын дамыту үшін мемлекеттік және жеке жобаларды қаржыландыру да зейнетақы жиынтығынан игеріледі.
Ғалымжан Пірматов, ҚР Ұлттық банкі төрағасының орынбасары:
-Бағалы қағаздар нарығын дамыту үшін мемлекеттік емес ұйымдардың қаржы құрылымдарына инвестиция болып табылады. Осы бағыттар бойынша ұсыныс жасалды. Ұлттық қорды басқару жөніндегі кеңестің мүшелері мақұлдап, қол қойғаннан кейін сіздерге тағы да хабарлаймыз.
Ұлттық банк төрағасы екінші деңгейлі банктер арасындағы мәмілелер туралы айтты. «Халық Банкі» мен «Қазком» банктерінен кейін тағы екі қаржы институты активтерін біріктірген. Олар: «Тенгри Банк» пен «Қазақстан капитал» банкі. Айта кетейік, салымшылардың несие және депозиттік қаржылары келісімшарт аясында сақталады.
Данияр Ақышев, ҚР Ұлттық банкінің төрағасы:
-Көптеген екінші деңгейлі қаржы ұйымдары біріктіруді қажет етеді. Сондықтан банктердің активтері қосылып жатыр. Мұндай жұмыстар жалғасады. Банктердің болашақтағы мүмкіндігі акционерлердің қолында.
Қазіргі уақытта Қазақстан нарығында екінші деңгейлі 33 банк жұмыс істейді. Ақпан айының қорытындысы бойынша, қаржы институттарының қоры 25 трлн 223 млрд теңгеге жеткен.
Авторлары: Аршын Кемелжан, Ерлан Әбжанов
БЖЗҚ активтерінің игерілетін бағыттары:
1. Мемлекеттік құнды қағаздар
2. Валюта сатып алу
3. Халықаралық қаржы ұйымдарының теңгемен шығаратын облигациялары
4. Мемлекеттік квази жобаларын қаржыландыру
5. ҚР қаржы нарығын қаржыландыру
