Şeir: Musa Yaqub - Niyə gəlmisən?
Səsləndirmə: Pünhan İsmayıllı
Biraddımla'ya YouTubeda abunə olmaq: [ Ссылка ]
Biraddımla'nın sosial şəbəkə ünvanları:
Instagram: [ Ссылка ]
Facebook: [ Ссылка ]
TikTok: [ Ссылка ]
Telegram: [ Ссылка ]
E-poçt: biraddimlayol@gmail.com
MUSA YAQUB - NİYƏ GƏLMİSƏN?
Soldurub bağını, töküb barını,
Daha şuxdan salıb yarpaqlarını,
Soldurub o çıraq yanaqlarını
Qış olub, üstümə niyə gəlmisən?
Sən adlı o xanım-xatını mənə,
Vermədin öz şahlıq taxtını mənə.
Qıymadın gül-çiçək vaxtını mənə,
Qış olub üstümə niyə gəlmisən?..
Məni həsrət qoyan ilk bəhərinə
İndi gəlib məni yada salıbmı?!
Gözünün alovu özgələrinə,
Saçının qırovu mənə qalıbmı?
Qış olub üstümə niyə gəlmisən?
Gözəllik - neylədin o bəxşişini,
Gəlmisən, bəs kimə bəxş etdik onu?
Nə bildin taleyin göndərişini
Qaytara bilmirəm, nə bildin bunu?
Nə bildin mən bir az ürəyi kövrək,
Qadın baxışında mütiyəm, lalam.
Nə bildin o həsrət məni əyəcək,
Nə bildin səninçin keçilmiş yolam.
Qış olub üstümə niyə gəlmisən?..
Ağlayan hirsimi soyutmağamı,
İncik ürəyimi uyutmağamı?..
Təkəbbürlü xanım, a nazlı xanım,
Yox, yox, yalvarışı saxla sən allah.
Bu yazıq baxışı saxla sən allah.
Di yaxşı, bu dili, bu fəndi saxla,
Dilinin altında o qəndi saxla.
Gücün var - keçəni qaytar, soraqla,
Qış olub üstümə niyə gəlmisən?..
Nə dedin?.. Ah, bu nə yanıqlı sözdü!
Bir dayan, gözündə bu nə torandı...
Ah, mənim ürəyim nə ikiüzlü,
Vüqarımı necə yerə vurandı! -
Bacara bilmədim, özümlə, heyf!
Qış olub üstümə niyə gəlmisən...
Sentyabr, 1982
Musa Yaqub:
"...Mənim siyasətim də, sözüm də şeirdir. İndi o qədər yaxşı pisə, pis də yaxşıya qarışıb, o qədər şeirlər qaynayıb-qarışıb ki, ayırd etmək olmur ki, hansı yaxşıdır, hansı pis. Mənim son şeirlərimdə bəzi sözlər siyasətdəndir, ürəyimin sözləridir. Mən özümdən danışıram, başqa şairlər nə yazır bilmirəm. Onlar indi dövrün səsini özündə cəmləşdirə bilər, amma mümkün deyil ki, şair cəmiyyətin içərisində yaşasın, amma söz deməsin. Mən də cəmiyyətin bir üzvüyəm. Etirazımı, sözümü şeirimlə deyirəm. İndi gərək oxuyasan, biləsən ki, bu nədir. Deyirlər ki, söz azaddır. Azaddır, o vaxt ki, eşidəsən, ona əməl edəsən. Söz əgər divara dəyib düşürsə, onda nə azadlıq olur?
Sosial məsələlərlə bağlı 15-20 il bundan əvvəl “Çörəkpulu” adlı şeir yazmışam. İndi bir dəfə yazmışam da, zaman, vaxt onun içərisinə gedir. Yazılıb bir dəfə, yoxsa təkrara dönür. Sosial məsələlər dəyişir, amma şairin ürəyi, qələmi dəyişmir axı...
“Ən böyük dərd odur ki, sünbül-sünbül tarladan bir dən sənin olmasın. Adın vətəndaş olsun, Vətən sənin olmasın... ”
Mən nə deyim...
“Yaxama nə qarmaq atırsan bala, Özümə ilişən neçə qıra var. Lap belə gül kimi siyasət ola, Onda da bir hiylə, bir iftira var”. Yəni hamısında biz öz sözümüzü deyirik. Kim özünə götürür götürsün. Şair tapança, güllə ilə danışmır ki, qələmlə danışır..."
#musayaqub #niyegelmisen #punhanismayilli #biraddimla #biraddimlayol
