“Sonsuz qardaşlıq- III” çoxmillətli təlimi davam edir
Qazaxıstanın Türküstan vilayətində yerləşən Orda poliqonunda keçirilən "Sonsuz qardaşlıq - III" çoxmillətli təlimi davam edir.
Azərbaycan, Qazaxıstan, Türkiyə, Pakistan, Qətər və Özbəkistan xüsusi təyinatlıları poliqonda yaradılmış təlim nöqtələrində taktika, atəş, snayper, dağ və paraşüt hazırlığı üzrə praktiki məşqləri yerinə yetirirlər.
Çoxmillətli qruplar halında keçirilən döyüş hazırlığı məşğələləri iştirakçı ölkələrin hərbi qulluqçularının təcrübəsindən bəhrələnməyə və onların tətbiq etdiyi forma və metodları mənimsəməyə imkan yaradır.
Hərbi qulluqçular təlimin “birgə xüsusi əməliyyatın” döyüş tapşırıqlarının öyrənilməsi mərhələsinə başlayıblar.
Ssenariyə əsasən, iştirakçı bölmələr qarşısında yaşayış məntəqəsindəki qeyri-qanuni silahlı dəstənin aşkar edilməsi və zərərsizləşdirilməsi üzrə təlim-döyüş tapşırığı qoyulub.
Döyüş şəraitinə maksimum uyğunlaşdırılmış şəraitdə keçirilən “birgə xüsusi əməliyyatın” məqsədi çoxmillətli qruplar halında döyüş tapşırıqlarının icrası zamanı hərbi qulluqçuların uzlaşma şəraitində və effektiv hərəkət etmə bacarıqlarının öyrənilməsidir.
Bu cür təlimlər bölgələrdə sülhün və təhlükəsizliyin təmin olunması məqsədilə səylərin birləşdirilməsinə xidmət edir və şəxsi heyətin qarşılıqlı əlaqədə qarşıya qoyulmuş tapşırıqların uğurlu icrasına böyük töhfə verir.
