Bakıda 4-CÜ Dünya Mədəniyyətlərarası Dialoq Forumu işə başlayıb.Forum çərçivəsində UNESCO mədəniyyətlərarası və dinlərarası kafedralarının 2-ci akademik forumu keçirilir. Mədəniyyət və turizm nazirinin müavini Sevda Məmmədəliyeva bildirib ki, Azərbaycan bu toplantıya böyük əhəmiyyət verir. Çünki 2015-ci ildə 3-cü Mədəniyyətlərarası Dialoq Forumu çərçivəsində bu toplantının birincisi Bakıda təşkil edilib. Onun sözlərinə görə, bu tədbir “Bakı prosesi”nin, habelə dünyada mədəniyyətlərarası dialoqun təhlili baxımından əhəmiyyətlidir.
Forum çərçivəsində YUNESKO-nun İpək Yolu “Onlayn” Platformasının Beynəlxalq Şəbəkəsinin 3-cü toplantısı keçirilir. Azərbaycanın YUNESKO yanında daimi nümayəndəsi Anar Kərimov bildirib ki, Bakı dünyada mədəniyyətləarası dialoqun inkişafına öz töhvəsini verir. “Bakı prosesi” dünyanı narahat edən problemlərin müzakirə olunduğu platformaya çevrilib. YUNSEKO-nun insan hüquqları üzrə attaşesi Liliya Çauşeva müzakirə olunacaq məsələlərin əhəmiyyətini xüsusi qeyd edib. Bildirib ki, dünyanın simasını dəyişmək üçün problemlərin həlli yollarını axtarmaq lazımdır. Bakı forumunda hər kəsə fikirlərini çatdırmaq və müzakirələr aparmaq üçün yaxşı imkan yaradılıb.
“Mədəniyyətlərarası dialoqun inkişafı: İnsan təhlükəsizliyi, sülh və davamlı inkişaf üçün yeni imkanlar” mövzusunda Forum UNESCO, BMT-nin Sivilizasiyalar Alyansı, Dünya Turizm Təşkilatı, Ərzaq və Kənd Təsərrüfatı Təşkilatı, Avropa Şurası, ISESCO-nun tərəfdaşlığı ilə keçirilir. Forumun rəsmi açılış mərasimi mayın 5-də baş tutacaq. Forum çərçivəsində 40-dək sessiya və tədbirin keçirilməsi planlaşdırılır. 4-cü Dünya Mədəniyyətlərarası Dialoq Forumunda iştirak etmək üçün 120-dək ölkə rəsmisi, 39 beynəlxalq təşkilatdan nümayəndələr, 50-dən çox qeyri-hökumət təşkilatı qeydiyyatdan keçib. Ümumilikdə, tədbirdə təqribən 800-dən çox xarici nümayəndə iştirak edir.
