#azərbaycan #hovsan #ekologiya #qoxu #neft #kanalizasiya #polis #qanun #cinayət #bələdiyyə #todaypress #todaypresstv #xəbərlər #sosial #siyasət #idman #maraqlı #iqtisadiyyat #faydalı #sonxəbər #gündəm #aktual #news #video
Ötən həftə dərdinə çarə tapıldığını düşündüyümüz Hövsandan yenə ardı-arası kəsilməyən şikayətlər gəlməyə başlayıb. Vətəndaşlar üfunət qoxusunun son günlər daha da şiddətli hal aldığını, hətta yayılan pis qoxuya görə bir neçə nəfərə təcili tibbi yardımın göstərildiyini bildiriblər.
COP29 tədbirinə bir neçə ay qalmış belə halların baş verməsi birbaşa ölkəmizin imicinə zərər vurur. Bir tərəfdə yeni meşələr, parklar salınır, abadlıq-quruculuq işləri görülür, digər tərəfdən isə ərazi çirkləndirilir. Maraqlıdır, bu təsadüfdür, yoxsa..
TodayPress olaraq məsələyə aydınlıq gətirmək üçün, yenidən rəsmi qurumlara üz tutduq. Qapısını ilk döydüyümüz İri Şəhərlərin Birləşmiş Su Təhcizatı Xidməti Bakı Sukanal idarəsi oldu. Çünki Ekologiya və Təbii Sərvətlər Nazirliyinin mətbuat katibi, eləcə də Hövsan bələdiyyəsinin sədri suallarımıza cavabı orada tapacağımızı bildirdi. Qurumun rəisi Əlizadə Nəsirovun sözlərinə görə, ərazidə yoxlama aparılıb və müəyyən edilib ki, həmin qoxunun neft boruları, Hövsan Aerasiya Stansiyası və ya Bakı Sukanal idarəsinə məxsus kanalizasiya xəttləri ilə heç bir əlaqəsi yoxdur:
“Ərazidə yayılan pis qoxunun bizim fəaliyyətimizlə əlaqəsi yoxdur. Buna baxmayaraq vəziyyətin səbəblərinə bir daha aydınlıq gətirmək üçün həmin ərazidə texnoloji araşdırmalar aparılıb. Müəyyən edilib ki, ərazidə mərkəzləşdirilmiş kanalizasiya şəbəkəsi qurulmayıb. Tullantı suları açıq qalmış kanallara axıdılır. Böyük ehtimalla həmin qoxu xüsusən isti günlərdə tullantı sularının buxarlanması nəticəsində meydana çıxır”.
Bu faktı sakinlər də təsdiqlədilər. Qeyd olundu ki, həftədə ən azı 1-2 dəfə olmaqla, kanalizasiya tullantıları xüsusi maşınlarla gətirilib, bu əraziyə tökülür. Nəticədə yaranan dəhşətli mənzərə bütün qəsəbə sakinlərinin kabusuna çevrilir.
Bakı Sukanal idarəsinin müfəssəl araşdırması nəticəsində əldə olunan bu və digər faktları Hövsan bələdiyyəsinin sədri Elbrus Xəlilovla bölüşdük. Problemin yaranma səbəbini izah etdik. Çıxış yolu olaraq ərazinin mühafizəyə götürülməsini, qanun pozucularının saxlanılaraq hüquq mühafizə orqanlarına təhvil verilməsini və onların qanun çərcivəsində cəzalandırılması istiqamətində müvafiq tədbirləri görməyi xahiş etdik. Çünki söhbət vətəndaşların sağlamlığından, qəsəbənin çirkləndirilməsindən, ekoloji terrordan gedir. Lakin aldığımız cavab bizi təəccübləndirdi.
Hövsan Bələdiyyəsindən bildirildi ki, əraziyə mütəmadi olaraq polis işçiləri tərəfindən baxış keçirilir. Qeyd olundu ki, qanunsuz formada zibil tullantısı halına bir neçə ay bundan öncə sadəcə bir dəfə rast gəlinib və nəticədə həmin şəxs cəzalandırılıb. Şikayət olunan tarixlərdə isə heç bir qeyri-qanunu hərəkət müşahidə edilməyib.
Maraqlıdır ki, vətəndaşların həftədə ən azı 1-2 dəfə şahidi olduğu hadisənin müqəssiri bu gün mücərrəd olaraq qalır. Görünür, qanun pozucuları çox yaxşı komfulyaj olmağı bacarırlar. Çünki davamlı olaraq polis işçiləri tərəfindən reydlər keçirilsə də, yaxalanmırlar. Bəs yaxşı, əhali bu “işin peşəkarları”ndan necə qurtulsun?
Mövzunu diqqətdə saxlayacağıq.
