Бүгін – Бүкіләлемдік жинақ күні. Еліміздегі жинақтау жүйесінің қалыптасқанына 14 жыл толыпты.
Жетістіктер жаман емес. Айтулы күнге орай Қазақстанның «Тұрғын үй құрылыс жинақ банкі» 9 айдың жұмысын қорытындылады. Жыл басынан бері 29 мыңға жуық қазақстандық отбасы аталған банк көмегімен баспана жағдайын жақсартқан.
Жыл басынан бері қазақстандықтарға 223 миллиард теңге ипотекалық несие берілсе, оның 168 миллиард теңгесі «Тұрғын үй құрылыс жинақ банкінің» еншісінде. Бұл жалпы нарықтың 75 пайызына тең. Банк қызмет көрсету сапасын арттырып, несие алушыларға ыңғайлы әрі жылдам болу үшін бірқатар ауқымды жұмыс атқарған. Мысалы, тамызда банк бұрын қолданыста болған бағдарламаларын «Баспана» бірыңғай тарифтік бағдарламасына ауыстырды.
Жанар Жұбаниязова, Қазақстанның «Тұрғын үй құрылыс жинақ банкі» АҚ Басқарма төрайымының орынбасары:
– Алдыңғы «Кемел», «Болашақ», «Бастау», «Өркен» бағдарламаларынан ең негізгі айырмашылығының бірі – әр салымшы өзінің келешекте, болашақта болатын несиесінің пайызын және өзінің жинақтау мерзімін өзі таңдай алады.
Сәуірден бастап банкте депозит ашу үшін комиссия алынбайды. Бұл шешім өз пайдасын беріп отыр. Мысалы, биыл 9 айда 255 278 адам шот ашқан. Бұл өткен жылдың тоғыз айымен салыстырғанда бір жарым есе көп. Қазір банкте күн сайын 2 мыңнан астам депозит ашылады.
Данияр Нұртаев, қала тұрғыны:
– Шарттармен таныстым. Сол депозиттерді ашу керек. Ең төменгі сомасы 15 мың болу керек. Соны енді өзінің шамасына қарап, ай сайын толтырып отырамыз.
Банк салымшыларының саны биыл 30 пайызға артқан. Бүгінгі таңда 477,3 миллиард теңгенің 988 мыңнан астам депозиті бар. Сондай-ақ банк –«Нұрлы жер» бағдарламасының операторының бірі. Клиенттерге қолайлы болу үшін онлайн-сервистер мен төлем қабылдаудың баламалы түрлерін де енгізуде.
Авторлары: Ұлан Нарынбек, Серік Бақбаев
