KNN رۆڵی یەكێتی لە گەورەبوونی كێشەی سەرۆكایەتی هەرێم دەخاتە روو
لە چەند ساڵی رابردوودا یەكێتی بە بەردەوامی مامەڵەی بە پرسی سەرۆكایەتی هەرێمەوە كردووە، KNN لەم راپۆرتەدا رۆڵی ئەو حیزبە لە گەورەبوونی كێشەی سەرۆكایەتی هەرێم بەپێی قۆناغەكان دەخاتە روو، هاوكات نوێترین دیدگای یەكێتی بۆ ئەو پرسە دەخاتە روو.
ساڵی 2005 و لەچوارچێوەی رێككەوتنی ستراتیژی پارتی پۆستی سەرۆكایەتی هەرێمی وەرگرت و بۆ ئەو مەبەستەش یاسای ژمارە 1ی ساڵی 2005 بەپێی خواستی پارتی لە پەرلەمانی كوردستان دەركراو یەكێتیش هیچ دژایەتیەكی یاساكەی نەكرد، لە دوای خولی یەكەمی دەسەڵاتی، مەسعود بارزانی، رایگەیاند: ئەگەر هەمواری یاسای سەرۆكایەتی هەرێم نەكرێتەوە و ئامادە نیە پۆستەكە وەربگرێتەوە، سەر ئەنجام رۆژی 21ی كانو‌ونی دووەمی ساڵی 2009 پەرلەمانی كوردستان كە لەلایەن عەدنان موفتی ئەندامی مەكتەبی سیاسی یەكێتیەوە سەرۆكایەتی دەكرا، پرۆژەكە بەدڵی پارتی و بارزانی هەموار كرایەوە.
لە دوای هەڵبژاردنەكەی 25 تەموزی 2009 و بەشداری گۆڕان لە پەرلەمانی كوردستان پرسی گەڕانەوەی دەستور و گۆڕینی سیستمی حوكمرانی بووە ئەركی لە پێشینەی ئۆپۆزسیۆن.
لە بەرامبەردا یەكێتی وەك پێشتر كەوتەوە مامەڵەكردن بە پۆستی سەرۆكایەتی هەرێم، ساڵی 2013 كاتێك ویلایەتی مەسعود بارزانی، كۆتایی هات، یەكێتی پاڵپشتی داواكەی پارتی پۆستی سەرۆكی هەرێمی بۆ ماوەی دوو ساڵ بە نایاسایی لە پەرلەمان درێژ كردەوە، ئەو كاتە مەلا بەختیار، لێپرسراوی دەستەی كارگێری مەكتەبی سیاسی یەكێتی رایگەیاند: درێژكردنەوەی ویلایەتی بارزانی لە بەرامبەر گەڕاندنەوەی دەستور بووە بۆ پەرلەمان، بەڵام دەستور نەگەڕێندرایەوە.
بارزانیش یاسای درێژكردنەوەی ویلایەتەكەی واژۆ نەكرد و بەرپرسیاریەتیەكەی خستە ئەستۆی یەكێتی و رایگەیاند: بۆ رێزگرتن لە دەنگی فراكسیۆنەكانی پەرلەمانی كوردستان تا خولی چوارەم بەردەوام دەبێت لە كارەكەی.
ساڵی 2015 كاتێك ماوەی بارزانی دوای درێژكردنەوەی بۆ دوو ساڵ كۆتایی هات، یەكێتیش وەك سێ لایەنی تر پرۆژەی بۆ هەمواری یاسای سەرۆكایەتی هەرێم هەبوو، بەڵام دواتر پشتی لە پرۆژەكەی كرد و پرۆژەكەشی بۆ نزیك بوونەوەی زیاتر لە پارتی بەكار هێنا.
كاتێكیش ماوەی بارزانی لە رێگەی ئەنجومەنی شوراوە درێژكرایەوە، عیماد ئەحمەد، وتەبێژی ئەو كاتەی یەكێتی رایگەیاند: پارتی هیچ راوێژێكی لەو بارەیەوە پێ نەكردوون، بەڵام دواتر یەكێتی وەك سەرۆكی هەرێم مامەڵەی لەگەڵ بارزانی كرد.گ
لە ئێستادا كە دەسەڵاتەكانی سەرۆكایەتی هەرێم دابەش كراون، پارتی و گۆڕان پرۆژەیان بۆ هەمواری یاساكە بردۆتە پەرلەمان، بەڵام یەكێتی دەیەوێت ئەم جارەش مامەڵە بەو پۆستەوە بكات.
ئەگەرچی لە چەند ساڵی رابردوودا یەكێتی لە بەرامبەر پۆستی سەرۆكی هەرێم، سەرۆك كۆماری عێراقی وەرگرتووە، سەرباری ئەوەش بە بەردەوامی ئەو پۆستەی وەك فشار لەسەر پارتی بەكار هێناوە.
ئێستا یەكێتی نایەوێت سەرۆكایەتی هەرێم سڕ بكرێت، پرۆژەیەكیشی بۆ چارەسەری كێشەكە نیە، ئەوەندە نەبێت كە لە سەروبەندی هەوڵەكانیان بۆ وەرگرتنی سەرۆك كۆماری عێراق دەیانەوێت پرسی هەڵبژاردنی سەرۆكی هەرێم بوروژێنن، بەڵام بە لایانەوە گرنگ نیە بە چ یاسایەك هەڵبژاردن بۆ سەرۆكی هەرێم بكرێت.
تێروانینێكی تری یەكێتی بۆ ئەو پۆستە پەیوەندی بە سەودا و مامەڵەی سەرۆك كۆمار و سەرۆكی هەرێمەوە هەیە و ئیدی یەكێتی شتێكی ئەوتۆی لا نامێنێت لە بەرامبەر سەرۆك كۆماری بیداتە پارتی.
پرسی سەرۆكایەتی هەرێم لە دیدی یەكێتیەوە پەیوەندی بە باڵ باڵێنی ناوخۆی حیزبەكەشیانەوە هەیە بەو پێیەی لە چەند ساڵی رابردوودا كۆسرەت رەسوڵ عەلی، بە جێگری سەرۆكی هەرێم رازیكرابوو، رەنگە نەمانی ئەو پۆستە كێشەی ناوخۆیەكانی یەكێتی قوڵتر بكاتەوە.
→ website: [ Ссылка ]
→ Facebook: [ Ссылка ]
→ youtube: [ Ссылка ]
→ [ Ссылка ]
→ Instagram: [ Ссылка ]?
hl=enhttps://twitter.com/knncchannel
