DURRES - Kishin dalë për të mbledhur rrjetat, por rezultojnë të zhdukur në det. Dy peshkatarët Avni Shahinaj 42 vjeç dhe Bekim Mançina 30 vjeç me origjinë nga Kukësi, e me banim në sektorin Rinia në Durrës, rezultojnë të zhdukur që prej pasdites së djeshme.
Në mungesë të kontaktit me të afërmit e tyre dhe vonesës në kthim, familjarët kanë denoncuar humbjen e dy peshkatarëve në polici. Fqinjët tregojnë se kontrollet gjatë natës janë zhvilluar vetëm nga policia e Shijakut, ndërsa gjatë ditës së sotme ka nisur kontrolli në det nga Roja Bregdetare dhe Policia e Kufirit.
Për të lokalizuar vendndodhjen e dy peshkatarëve, të cilët kanë dalë në det me mjetin e peshkimit të llojit “sanalle” rreth orës 16:00 të pasdites së djeshme, sot Roja Bregdetare dhe Policia Kufitare po zhvillon kërkime në det.
Ndërkohë në tokë po patrullohet në këmbë nga efektivat e rendit dhe banorë të zonës, por pa mundur të bien në gjurmët e dy të humburve. Sipas policisë kërkimet po zhvillohen në një perimetër prej 4 miljesh nga bregu, por deti që arrin forcën e 5 ballë, vështirëson operacionin e kërkim shpëtimit.
Ndërkohë në operacionin e kërkim-shpëtimit janë përfshirë edhe polumbarët e RENEA-s.
Ещё видео!