Ballade à 4 de François Andrieu - alias Magister
Franciscus ou Franciscus Andrieu - (fl. fin XIVe s.)
Codex Chantilly, MS 0564, Folio 52, recto
Ensemble P.A.N.(Project Ars Nova), dir. Crawford Young
Cantus 1
A) Armes, amours, dames, chevalerie,
clers, musicans et fayseurs en françoys,
A') tous sosfistes, toute poeterie,
tous cheus qui ont melodieuses vois,
B) ceus qui cantent en orgue aucunes foys
et qui ont chier le doulz art de musique,
demenés duel, plourés! Car c’est bien drois,
*) la mort Machaut, le noble rethouryque.
A) Onques d’amours ne parla en follie,
ains a esté en tous ses dis courtois;
A') aussi a molt pleü sa chanterie
aus grans seigneurs, aus contes, aus longns.
B) Hé! Horpheüs, assés lamenter dois
et regreter d’un regret autentique,
Arethuse aussy, Alpheüs, tous trois
*) la mort Machaut, le noble rethouryque.
A) Priés por li si que nulls ne l’oublie:
ce vous requiert le bayli de Valois,
A') car il n’en est au jor d’uy nul en vie
tel com il fu, ne ne sera des moys.
B) Complains sera de contes et de roys
jusqu’a lonc temps per sa bone practique.
Vestés vous noir; plorés, tous Champenois.
*) La mort Machaut, le noble rethouryque.
Cantus 2
A) O flour des flours de toute melodie,
tres doulz maistres qui tant fuestes adrois,
A') o Guillaume, mondains diex d’armonnie,
après vos fais, qui obtiendra le choys
B) sur tous fayseurs? Certes, ne le congnoys.
Vo nom sera precieuse relique,
car l’on plourra en France, en Artois,
*) la mort Machaut, le noble retorique.
A) Le fons chierie et la fontayne Helie,
dont vous estés le ruissel et le dois,
A') ou poetes mirent leur estudie,
convient carront, dont je suy molt esbaïs.
B) Las! c’est pour vous qui mort gisiés tous frois
qu’ay un dolent depit, faillant replique,
plourés, arpes et cors saracynois,
*) la mort Machaut, le noble rethouryque.
A) Plourés, rubebe, viele et ciphonie,
psalterion, tous instrumens courtois,
A') guisternes, fleustes, herpes, chelemie,
traversaynes et vous, amples de vois,
B) timpane ossy, metés en orse doys,
tous instrumens qui estes tout antiques,
faites devoir, plourés, gentils Galoys,
*) la mort Machaut, le noble rethouryque.
