Բանաձևը քննարկելուց առաջ Ներկայացուցիչների պալատը նախ հաստատեց այն քննարկելու և քվեարկության դնելու հարցը, ընդունեց ու սկսվեցին ելույթները: 3 ժամում խոսեցին մոտ 3 տասնյակ կոնգրեսականներ, նրանց մեջ՝ Միացյալ Նահանգների 3-րդ ամենաբարձրաստիճան պաշտոնյան նախագահից ու փոխնախագահից հետո՝ պալատի խոսնակ Նենսի Փելոսին:
Կոնգրեսական Ֆրենկ Փալոնը նիստին եկել էր Հայաստանի դրոշի գույներով փողկապով: Կոնգրեսական Բրեդ Շերմանն էլ բացատրել է, թե ինչու է կարևոր ցեղասպանության վրա աչք չփակելը, անկախ նրանից, թե քանի տարի է անցել:
Բանաձևի համահեղինակ, կոնգրեսական Ադամ Շիֆը հուզվեց, շնորհակալություն հայտնեց բոլոր աջակիցներին: Ներկայացուցիչների պալատում մեծամասնության ղեկավար, դեմոկրատ Սթենի Հոյերը նույնպես զգացմունքային ելույթ ունեցավ:
Բանաձևն ընդդիմախոսներ գրեթե չուներ: Դեմ խոսեց միայն մեկը՝ Տեխասը ներկայացնող Մայքլ Բյորջեսը:
Քվեարկության պատկերը տպավորիչ էր: Բանաձևն ընդունվեց ձայների 405 կողմ ու ընդամենը 11 դեմ հարաբերակցությամբ:
