Мемлекет басшысы Нұрсұлтан Назарбаевтың АҚШ президенті Дональд Трамппен кездесуі туралы әлемдік ақпарат құралдары жарыса жазып жатыр.
Америкадағы жетекші телеарналардың бірі CNN президенттердің кездесуін тікелей эфирде көрсеткен еді. Бұдан кейін белгілі басылымдар да екі елдің көпжақты қарым-қатынастары туралы сараптамалық мақалалар кеңінен жазылды.
Американың белді басылымдарының бірі Нью-Йорк Таймс кездесуде ядролық қару туралы айтылған қос Президенттің пікірлеріне кеңінен тоқталған. Ал «Вашингтон постта» Дональд Трамптың «Солтүстік Кореяның ядролық режимі әлемге қауіп төндіруіне жол бермеуіне бірлесе ықпалдастық орнату» турасында айтқан сөзі жарияланған.
Әйгілі «Уолл-стрит Джорнэл» екі елдің стратегиялық әріптестігін тереңдетіп, сауда-экономикалық бағытта ынтымақтастықты арттыру мәселесін талқыласа, «The Diplomat» ақпараттық басылымында Ақ үйде екіжақты сауда қатынастары, Ауғанстан мен Солтүстік Кореядағы жағдайлардың кеңінен талқыланғаны жазылды. Cондай-ақ басылым Орталық Азиядағы қауіпсіздік пен тұрақтылық мәселесін шешуде Қазақстанның ықпалы жоғары екеніне тоқталған
Ал «Дэйли Ньюс» және «Форбс» басылымдарында Қазақстан және Америка Құрама Штаттарының экономикалық қарым-қатынастарына шолу жасалып, қай салаларда әріптестік жоғары, қай бағытта байланысты нығайта түсу қажеттігі жөнінде сараптамалық ой-пікірлер жазылған. Екі елдің инвестициялық жобалары, шағын және орта бизнестегі ықпалдастығы турасындағы экономистердің болжамдары тарқатылған.
Қазақстан мен АҚШ президенттерінің кездесуі – сенімді серіктестіктің белгісі. Дәл осындай тақырыпта америкалық The Hill басылымы ақпарат таратты. Мақалада екі елдің де Орталық Азиядағы қауіпсіздікті қамтамасыз етуге мүдделі екені айтылған. Өйткені Ирак пен Сириядағы лаңкестік топтардың қатарында соғысқан жауынгерлер көрші елдерге сіңіп, қауіпті күшейтеді. Ал Орталық Азия елдерімен әріптестікті кеңейтуді қалаған АҚШ үшін аймақтағы жетекші мемлекеттің басшысымен кездесудің маңызы зор делінген.
Қазақстан Президенті Нұрсұлтан Назарбаев пен Ақ үй қожайыны Дональд Трамптың кездесуі жайлы белгілі Voice of America басылымы да мақала жариялады. Халықаралық радиокомпания қос мемлекет басшысының халықаралық экстремизм мен терроризмге қарсы әріптестікті нығайтуға дайын екеніне тоқталған. Материал авторының айтуынша, «батыс елдері Ауғанстандағы ахуалды өз күшімен жөнге сала алмайды. Ал Біріккен Ұлттар Ұйымының Қауіпсіздік Кеңесіне төрағалығын бастаған, әрі Орталық Азияда орналасқан Қазақстанның мұндай шиеленісті бейбіт жолмен шешуге ықпалы зор», – деп айтылған.
Жалпы Америка – Голландиядан кейінгі Қазақстанның ең ірі инвесторларының бірі. Сондықтан басылымдардың басым бөлігі экономикалық байланыс жөнінде жазған екен. Ресейлік Взгляд және Коммерсант басылымдары бұл қарым-қатынастарға өте жоғары баға берген.
