Ертіс өңірінде көктемгі су тасқыны кезеңінде оқыс оқиғалар туындап қалса, төтенше жағдайларды алдын алуға және жоюға 893 млн теңге қарастырылған. Облыс бюджетіндегі қомақты қаражат шығындарды өтеуге жұмсалуы мүмкін.

Синоптиктер наурыздың үшінші онкүндігінде ауа температурасы +10 градусқа көтерілетінін болжауда. Бүгінге дейін облыстың қала-ауылдарынан 1 млн 385 мың текше метр қар шығарылған.

Қазір төтенше жағдайлар қызметінің құрылымдары су тасқынының алдын алу шараларын пысықтауда. Қауіпті өңірлер бақылауға алынды, тас және теміржолдар бойындағы 1000-нан астам су өткізу құбырлары мен гидроқұралдар тазартылған. Сонымен қатар 9 мың тоннаға жуық инертті материал дайын. Жанармай қоры – 923 тонна.

Жалпы Павлодар облысында қардың шамадан тыс көп түсуі соңғы 40 жылда тіркелмеген.

Әлібек Длимов, Павлодар облыстық ТЖД бастығы:

-Қауіп төндіретін елді мекендердің саны 49-ға жетті. Себебі қардың қалың түсуіне байланысты Шарбақты ауданы мен Успенск ауылында қосымша елді мекендер қосылды.

свернуть